भारतमा फेरि एकैदिन सबैभन्दा धेरै कोरोना संक्रमित
भारतमा २४ घण्टामा अहिलेसम्मकै बढी कोरोना भाइरसका संक्रमित भेटिएका छन् । पछिल्ला केही दिनदेखि दिनानुदिन संक्रमितको रेकर्ड तोडिएको छ । बिहीबार भारतमा १८ हजार १८५ संक्रमित थपिएका छन् ।
यसअघि बुधबार १६ हजार ८७० जना कोरोना संक्रमित थपिएका थिए । जुन आफैमा रेकर्ड थियो । यसअघि मंगलबार १५ हजार ६५३ जना संक्रमित थपिएका थिए । अहिलेसम्म भारतमा कोरोना संक्रमित ४ लाख ९१ हजार १७० जना पुगेका छन् ।
पछिल्लो २४ घण्टामा १३ हजार ९८३ जना संक्रमितलाई निको भएको छ । अहिलेसम्म निको हुनेहरु २ लाख ८५ हजार ६७१ पुगेका छन् । पछिल्लो २४ घण्टामा ४०१ जनाको ज्यान गएको छ । बुधबार ४२४ जनाको ज्यान गएको थियो । मंगलबार ४६८ जनाको ज्यान गएको थियो । त्यो संख्या दोस्रो उच्च थियो । गत हप्ता भने एकैदिन २ हजार ४ जनाको ज्यान गएको थियो । मृतकको संख्या अहिलेसम्म १५ हजार ३०८ पुगेको छ ।
