१२ नम्बर वडामा जनताको काम मेरो पहिलो प्राथमिकता हो– वडा अध्यक्षका उम्मेदवार राजेश नगरकोटी

हेटौँडा उपमहानगरपालिका वडानम्बर १२ बाट २०७९ को निर्वाचनमा बिजेता बन्नुभएका वडा अध्यक्ष ललित घलान, जिल्ला समन्वय समितीको प्रमुख बनेपछि यहाँ वडा अध्यक्ष पद रिक्त हुन पुग्यो । निर्वाचन आयोगले मंशीर १६ गते वडा अध्यक्ष चयनका लागि उप निर्वाचन गराउँदैछ । यो निर्वाचनमा राजनीतिक दल र स्वतन्त्र गरी १२ जना उम्मेद्वार प्रतिस्पर्धा गरिरहेका छन् । नेकपा एमालेले २०७९ को निर्वाचनमा प्रतिस्पर्धा गरिसक्नु भएका राजेश नगरकोटीलाई पुनः उम्मेद्वार बनाएको छ । उपनिर्वाचनकै सन्दर्भमा रहेर उहाँसंग गरिएको संक्षिप्त कुराकानी ।

गत निर्वाचनमा पराजित भएपनि पुनः उपनिर्वाचनमा उम्मेद्वार बन्नुभएको छ । यसपटक सफल हुनेमा कत्तीको विश्वस्त हुनुहुन्छ ?

अघिल्लो निर्वाचनमा म केही थोरै मतले पराजित भए । निर्वाचनको परिणाम जस्तोसुकै आएपनि म निरन्तर हेटौँडा उपमहानगरपालिका वडनम्बर १२ का जनता माझ छु । उहाँहरुको सुखदुःखमा सधैसंगै छु । मैले २०७९ को निर्वाचनमा धेरै मतदाताको मन जितेरै मत पाए । त्यो मत सम्मानजनक नै थियो । अहिले परिस्थिती फेरिएको छ । मतदाताको घरदैलोमा जाँदा उहाँहरुले देखाउनुभएको माया स्नेहले यो पटक मैले उहाँहरुको सेवा गर्ने अवसर पाउनेछु भन्नेमा म विश्वस्त छु । मलाई नेकपा एमालेले विश्वास गरेर पुनः उम्मेदवार बनाएको छ । पार्टीका साथीहरुले पनि विश्वास गर्नुभयो । हाम्रो पार्टीको भरोसा र विश्वासलाई १२ नम्बर वडा बासीले पनि विश्वास गर्नु हुनेछ भन्नेमा म ढुक्क छु ।

हेटौंडा उपमहानगरपालिका वडानम्बर १२ लाई विकासका दृष्टिकोणले समृद्ध बनाउने तपाईका योजना के छन् ?

मानब मस्तिष्कको चेतना नै विकास हो । त्यसैले यहाँको साक्षरता दर बढाउनुपर्छ । हाम्रो वडामा रहेका केही बिद्यालयमा भौतिक पुर्बाघार नमूनाकै छन् । केही विद्यालयको भौतिक पुर्वाधारमा सुधार ल्याउनुपर्छ । प्रत्येक विद्यालयबाट गुणस्तरीय शिक्षा उपलब्ध गराउने योजना बनाई काम गर्नेछु । प्राबिधीक शिक्षाको ब्यवस्था गर्ने, प्रदेश युवा परिषद बागमतीसंगको सहकार्यमा युवाहरुलाई सीप सहितको दक्ष जनशक्तीका रुपमा रुपान्तरण गर्ने मेरो प्रमुख ध्येय रहनेछ । बागमती प्रदेशको सामजिक विकास मन्त्रालयसंग समन्वय गरेर छोरी बुहारीलाई उच्च शिक्षा निशुल्क ब्यवस्था गर्ने, बालविवाह र स्कुल छाड्ने प्रबृत्ती रोकेर सबै बालबालिकालाई शिक्षामा पहुँच पुर्र्याउने ब्यवस्था मिलाउने योजना बनाएको छु । हाम्रो वडामा रहेका ७ वटा बिद्यालयमध्य ४ वटा मात्रै सञ्चालनमा छन् । अब सबै बिद्यालयहरु सञ्चालन गर्ने योजना बनाएको छु ।

यसमा मलाई सबै वडा बासीको साथ मिल्नेछ भन्ने विश्वास लिएको छु । सीप र शिक्षाले युवालाई रोजगारीको अवसर मिल्नेछ । सीपयुक्त युवा आफु स्वरोजगार हुँदै अरुलाई समेत रोजगारी दिन सक्ने बनाउनुपर्छ । यस्तै कृषिमा हाम्रो वडामा प्रशस्तै सम्भावना छन् । हाम्रा रैथाने बालीहरुको संरक्षण गर्दै हाम्रो मौलिकता जोगाउनुपर्छ । कृषिमा आधुनिकीकरण, उन्नत नश्लका पशुपालन, हाम्रो वडाका धेरै कृषक दाजुभाईहरुले सुरु गरिसक्नुभएको छ । हाम्रो वडा आधुनिक कृषि प्रबिधीसंग परिचीत भईसकेको छ । आधुनिक तरिकाबाट कृषि र पशुपालन गरिरहनुभएका किसानलाई प्रदेश ,संघ र स्थानीय सरकारले दिने अनुदानमा सहभागी गराउन प्रस्ताब लेखन, कृषि फार्म दर्ता लगायतका विषयमा वडाबाटै सहजीकरण गर्ने ब्यवस्था मिलाउने योजना छ । कृषि र प्रबिधीका विषयमा किसानले अनलाईनबाटै धेरै कुरा सिक्नेगरी विशेषज्ञ र कृषकलाई एकैठाउँमा जोड्नेगरी योजना बनाएको छु यसले कृषि उत्पादन बढ्नेछ ।

निर्वाहमुखी कृषि कर्मलाई परिवर्तन गरेर व्यवसायमुखी कृषिकर्म बनाउने योजना छ । यस्तै कृषि पर्यटनको सम्भावना हाम्रो वडामा धेरै नै देखेको छु । १२ नम्बर वडा प्रबेश गर्न कुखरेनी खोलामा पुल बनेको छ । वडा प्रबेश गर्ने बित्तीकै सरकारी लगानीको आकर्षक बनस्पती उद्यान पुग्न सकिन्छ । त्यस उद्यानमा वनस्पती र जडीबुटीका धेरै विषयहरु अध्ययन गर्न सके हाम्रो वडाले त्यसबाट महत्वपूर्ण उपलब्धी हासिल गर्न सक्नेछ । बनस्पतिबाट अगाडी आउँदा लखनथापाको स्मृतिमा आकर्षक पार्क बनेको छ त्यसको संरक्षण अपरीहार्य भएको छ । दिगो विकासको लक्ष्य पूरा गर्नेगरी सिंचाई ढल बाटोघाटो पुलपुलेशा निर्माण गर्नुपर्नेछ । हाम्रो वडाका सबै स्थानहरुमा समानुपातिक विकास पुर्र्याउनुपर्नेछ । वडाका स्थानीय बासिन्दा बर्षाका बेला सहजै कामबाट घर पुग्न सक्नेगरी वडाको कनेक्टीभीटी सहरसंग जोड्नुपर्नेछ । मैले समृद्द १२ नम्बर वडा बनाउने गरी विकासको योजना बनाएको छु मेरो योजनामा यहाँको स्थानीय बासिन्दाको सल्लाह सुझाब समेटिने छ । हाम्रो विकास, हाम्रै लागि, हाम्रै पहलमा भन्ने सोँचका साथ अघि बढ्ने योजना छ ।

पछिल्लो समय उम्मेदवारहरुले आफ्नो चुनावी एजेण्डामा मात्रै अनेक कुराको आकर्षण दिने गरेको भन्ने मतदाताहरुको आरोप छ, यसलाई कसरी लिनुहुन्छ रु
म अहिले उम्मेदवार हुँ । त्यसकारण पनि मतदाताहरुले शंकाको सुबिधा पाउनुहुन्छ । अघिल्लो निर्वाचनमा हाम्रा पार्टीबाट निर्वाचित साथीहरुले राम्रै काम गरेको उदाहरण हामीसंग छ । उपमहानगरको मुल्यांकनमा हाम्रो वडा उत्कृष्ट रहेको थियो । म अब त्यही टिमको नेतृत्व लिन मैदानमा आएको छु । हामीले गर्न नसकिने कुरा गरेका छैनौँ । मैले पुर्व मन्त्री माननीय एकालाल श्रेष्ठको सचिवालयमा बसेर पनि विकास निर्माणका योजना बनाउने अबसर पाएको थिए । मन्त्रालयमा बसेर काम गर्दा धेरै अनुभव बटुलेको छु । त्यतिखेर पनि वडाको विकासका लागि बजेट छुट्याउन मेरो पहल रह्यो । त्यो बजेटलाई वडाको विकासमा लगाउने जिम्मा मलाई नै वडाबासीहरुले दिनुहुनेछ भन्ने मेरो बुझाई हो । स्वास्थ्य क्षेत्रमा हेर्ने हो भने हाम्रो वडामा एउटा स्वास्थ्य चौकीे छ । यसलाई अस्पतालमा रुपान्तरण गर्नुपर्छ । विशिष्ट प्रकृतिको उपचारका लागि मात्रै वडा बासीले हेटौँडा अस्पताल पुग्न परोस् । अघिपछि वडाको अस्पतालबाटै सहज उपचार सेवाको ब्यवस्था मिलाउन सकिन्छ । मेरो विशेष ध्यान यसमा केन्द्रित हुनेछ ।

वडाबासीलाई सुरक्षाको प्रत्याभुती दिलाउन तपाईको योजना के छन् ?

मानिसका अन्य आवश्यकता जस्तै शान्ति सुरक्षा अत्याबश्यक हो । सुरक्षाका लागि हामै्र्र वडामा प्रहरी कार्यालय रहने गरी योजना बनाउनुपर्छ । वडा कार्यालयकै पहलमा प्रहरी चौकी भवन बनाएर त्याँहा प्रहरी राख्ने ब्यवस्था मिलाउन सकिन्छ । यसका लागि मेरो विशेष पहल रहने प्रतिबद्धता पनि जनाउन चाहन्छु ।

राजनीतिमा आउनुभन्दा अघि तपाईको आबद्दता शिक्षण पेशामा थियोरु त्यही पेशालाई निरन्तरता दिँदा तपाईको ब्यक्तीगत जीवन सुरक्षित थियो । तर शिक्षण पेशा छाडेर राजनीतीमा किन आउनुभयो ?

राजनीतीमा आउनुअघि म पेशाले शिक्षक थिए । तर मेरो बाल्यकाललाई हेर्ने हो भने म सानै उमेरमा राजनीतीमा रहेछु । मेरो बुबा कृष्ण नगरकोटी बामपन्थी आन्दोलनमा जेलनेल बिताउनुभएको नेतृत्व हो । बाल्यकालमा प्रजातन्त्र प्राप्तीका लागि भएको आन्दोलनमा बुवा सधै निरन्तर लाग्नुभयो । बालकलाकार बनेर मैले त्यो आन्दोलनमा सहभागिता जनाएको थिए । अध्ययन गर्दै जाँदा जीवन निर्वाहका लागि मैले हाम्रै वडाका विद्यालयहरुमा शिक्षण पेशा गरे । मैले धेरै बिद्यार्थी भाइ वहिनीहरुलाई ज्ञान दिने सौभाग्य पाए । तर मेरो ब्यक्तिगत जीवनको सफलता भन्दा समाजको उन्नतीमै मेरो ध्यान केन्द्रित भयो । मैले शिक्षण पेशा छाडेर राजनीतीमा आउने निर्णय लिए । हालसालै हेटौँडा उपमहानगरपालिका वडानम्बर १३ मा युवा संघ मकवानपुरको साधारण सभा सम्पन्न गरेर अध्यक्षको जिम्मेवारीमा छु । मेरै पहलमा यहाँ अधिबेशन हुँदा त्यसले हाम्रो गाउँठाउँका बारेमा सबैतिर सकारात्मक सन्देश समेत दिएको थियो । म राजनीतीमा आउनुको प्रमुख कारण चाही समाज सेवा नै हो ।

नेकपा एमालेलाई यहाँका मतदाताले मत दिनुपर्ने महत्वपूर्ण आधार चाही के हो ?

हेटौँडा उपमहानगरपालिकालाई सफा स्वच्छ हराभरा बनाउन नेकपा एमालेको महत्वपूर्ण भूमिका छ । अझै भन्ने हो भने १२ नम्बर वडालाई नगरमा गाभ्ने योजनाको मुख्यसुत्रधार डोरमणि पौडेल हाम्रै नेता हो । अनन्त पौडेल सुकुम्बासी समस्या समाधान आयोगमा हुँदा उहाँकै नेतृत्वमा साबिक १२ नम्बर वडाको बनस्पतीमा ब्यवस्थित बसोबास गराईयो । ९ नम्बर वडा र हाम्रो वडा जोड्ने पुल एमालेकै पहलमा बन्यो । यहाँका सर्वसाधारणलाई जग्गाधनी प्रमाणपुर्जा उपलब्ध गराउन एमालेले खेलेको भूमिका यहाँका मतदातले बिर्सीएका छैनन् । एमालेका नेतृत्वहरु डोरमणि पौडेल, जुनेली श्रेष्ठ, एकालाल श्रेष्ठ मुख्यमन्त्री, मन्त्री, सांसद भएका बेला यस वडामा छुट्याएको बजेटले भएका विकास आम सर्वसाधारणको आँखामा छन् । अघिल्लो पटक एमालेबाट मेयर जित्नुभएका हरिबोल महतको कामबाट प्रभावित भएका यहाँका स्थानीयले उहाँको फोटो सहित “हाम्रो मेयर, राम्रो मेयर” लेखेर ब्यानर नै राखेका छन् । मेरो, मेरो परिवारको राजनीतिक पृष्ठभूमी, मैले १२ नम्बर वडाको विकासका लागि खेलेको भूमिका सबै यहाँका आमा बुवा दाजुभाइ, दिदीबहिनीले देख्नुभएको छ ।

अन्तिममा, यहाँका मतदाताले सूर्य चिन्हमै मत दिनुपर्ने आधारहरु के हुन् ?

यहाँका गुम्बा , मठमन्दिरहरुको संरक्षण, मौलिक संस्कृतिको रक्षा, मेलापर्व जात्राहरुको संरक्षण, रैथाने बीउ बालीहरुको संरक्षण गर्दै अहिलेको आधुनिकतासंग हाम्रो समाजको मौलिकताको मिलन गराउन मेरो भूमिका रहन्छ । यहाँका बनजंगल, खोलानाला र प्रकृतिको सुन्दरतालाई यथावत कायम राख्न म विशेष पहल गर्नेछु । १२ नम्बर वडा बालबालिका मैत्री, वृद्धावृद्धा मैत्री, महिला मैत्री र युवा मैत्री बनाउन मेरो पहल रहनेछ । यसका लागि मङ्सिर १६ मा हुन गइरहेको उपनिर्वाचनमा मलाई आफ्नो अमुल्य मत दिनुहुन सम्पूर्ण वडाबासीहरुमा विनम्रता पुर्वक अनुरोध गर्दछु ।