जीवन र जिन्दगी

विजयकुमार महर्जन

सोच्छु जीवन
सबैको सहज कहाँ छ र ?
सोच्छु जिन्दगी
सबैको एकनास कहाँ छ र ?
फरक फरक जीवनको
फरक फरक जिन्दगीको
कथा बोक्दै हिँडेका पात्रहरू
व्यथा बटुल्दै हिँडेका यात्रीहरू
भेटेकै हुन्छु, बुझेकै हुन्छु
उनीहरूको जीवनकहानीसँग
डुबेकै हुन्छु
उनीहरूका मर्मवेदनाहरूसँग
भिजेकै हुन्छु
निर्दोषी कत्ति जीवन यहाँ
दोषी बनेकै छन्
दोषी कैयौँ जिन्दगी यहाँ
निर्दोषी बनेकै छन्
फूल कति छन् यहाँ
फुल्न नपाउँदै ओइलाएका
जीवन कति छन् यहाँ
जिउन नपाउँदै बिलाएका
यी जीवन र जिन्दगीको
परिभाषाहरूमा
जीवन र जिन्दगी जिउने
अभिलाषाहरूमा
अलमलिरहेको रुमल्लिइरहेको
जिन्दगी सबैको
जिन्दगी सबैको…।