‘कामिनो’मा बसेको नीतिको मुटु र आत्मा

मिस नेपालमा सहभागी भएपछि नीति शाहलाई फिल्म प्रस्तावको ओइरो लागेको थियो । तर, उनले लामो समय फिल्ममा काम गर्ने मन देखाइनन् । अब भने फिल्ममा नै करिअर बनाउने सपना बुनेकी छन् । यसैले लगातार फिल्म सम्झौता गरिरहेकी छन् । उनले लकडाउनभन्दा अघि फिल्म ‘हुतुतु’ र त्यसपछि फिल्म ‘एक्स ९’ साइन गरेकी थिइन् । तर, दुवै फिल्म निर्माण हुन सकेका छैनन् ।

फिल्ममा डेब्यूका लागि हतारिएकी उनले गत वर्ष तेस्रो फिल्म साइन गरिन्, ‘कामिनो’ । त्यसबेला उनले कलाकार अनुप बरालबाट तीन महिनाको अभिनय कोर्स गरिरहेकी थिइन् । यो फिल्ममा उनको जोडी अभिनेता प्रदीप खड्कासँग बाँधिनेछ । अहिले उनको तन-मन नै यही फिल्ममा छ । केही हप्तादेखि फिल्मको टिमसँग स्क्रिप्ट र आफ्नो चरित्रको बारेमा उनले छलफल गरिरहेकी छन् ।

सम्झौताको हिसाबले ‘कामिनो’ नीतिको तेस्रो फिल्म भए पनि अभिनयको हिसाबले पहिलो हुँदैछ । आगामी जेठबाट छायांकन सुरु हुन लागेको फिल्मलाई लिएर उनी निकै गम्भीर देखिएकी छन् । आइतबार उनले इन्स्टाग्राम स्टोरीमा फिल्मको स्क्रिप्टको एक तस्विर सेअर गर्दै लेखेकी छन्, ‘मेरो मुटु र आत्मा यो प्रोजेक्टमा ​​छ ।’ यसले ‘कामिनो’प्रति उनको एकाग्रता र गम्भीरता बुझाउँछ ।

पहिलो फिल्म भएकाले उनलाई ठूलो दबाब र चुनौती छ । किनकि, यो फिल्मले उनको करिअरको जन्मकुण्डली लेख्नेछ । एकातिर उनलाई अभिनयमा बुलन्द हुनुपर्ने चुनौती छ भने अर्कोतिर फिल्म व्यावसायिक रुपमा सफल हुनुपर्ने दबाब पनि छ । त्यसमाथि मिस नेपाल पृष्ठभूमिका प्रायः अभिनेत्रीहरुले नेपाली फिल्ममा बलियो उपस्थिति जनाउन सकेका छैनन् । अब प्रतिक्षा नीतिको छ ।