आज भ्यालेन्टाइन डेः प्रेम र स्नेह साटासाट गरिँदै, मकवानपुरका पर्यटकिय क्षेत्रमा चहलपहल
हेटौंडा । आज ‘भ्यालेन्टाइन डे’ अर्थात् प्रणय दिवस। नेपालसहित विश्वभर आज एकअर्काप्रति प्रेम र स्नेह साटासाट गरी यो दिवस मनाइँदै छ। यस दिनका अवसरमा मकवानपुरका पर्यटकिय क्षेत्रहरुमा निकै चहलपहल बढेको छ ।
बिशेषगरी मकवानपुरको शहिद स्मारक, मकवानपुरगढी, हेटौंडाको बनस्खण्डी, पुस्पलाल पार्क, त्रिखण्डी, त्रिबेणिधाम लगायतका क्षेत्रमा युवा युवतीहरुसंगै श्रीमान श्रीमती, बालबच्चाहरु सहित घुम्न जानेहरुको सख्या आज निकै बढेको छ ।
हरेक वर्ष फेब्रुअरी १४ मा यो दिवस मनाउने गरिन्छ। पछिल्लो सयम नेपालमा पनि ‘भ्यालेन्टाइन डे’ सामाजिक तथा सांस्कृतिक रूपमा स्थापित हुँदै गएको छ।
सामाजिक सञ्जालको तीव्र विकाससँगै यो संस्कृतिमा अझ बढोत्तरी भएको छ। त्यसमा पनि युवायुवतीबीच यो पर्व अझ लोकप्रिय बन्न थालेको छ।
आजको दिन प्रेमीप्रेमिकाले एकअर्कालाई फूल, कार्ड, चकलेटलगायत उपहार आदानप्रदान गर्दै आफ्ना भावना अभिव्यक्त गर्ने चलन बढ्दै छ।
विशेषगरी आजको दिन पार्क, सिनेमा हलसहितका मनोरञ्जलस्थलहरुमा प्रेमिल जोडीहरुको भीडभाड लाग्ने गर्दछ।
‘भ्यालेन्टाइन डे’ मनाउने परम्परा तेस्रो शताब्दीका सन्त भ्यालेन्टाइनसँग जोडिएको विश्वास छ। रोमन शासक क्लोडियसले सैनिकलाई विवाह गर्न रोक लगाएपछि सन्त भ्यालेन्टाइनले त्यसको विरोध गर्दै गुप्त रूपमा विवाह गराइदिएका थिए।
यही कारण उनलाई सन् २६९ को फेब्रुअरी १४ मा मृत्युदण्ड दिइएको थियो। उनको बलिदान र प्रेमप्रतिको समर्पणको सम्झनामा यो दिवस मनाउने परम्परा सुरु भएको विश्वास छ।
भ्यालेन्टाइन डे अघि एक सातासम्म विभिन्न ‘डे’ हरू मनाउने चलन बढ्दै गएको छ। फेब्रुअरी ७ देखि सुरु हुने यस सप्ताहमा ‘रोज डे’, ‘प्रपोज डे’, ‘चकलेट डे’, ‘टेडी डे’, ‘प्रमिस डे’, ‘किस डे’ र हग डे हुँदै अन्ततः ‘भ्यालेन्टाइन डे’ मनाइन्छ।
भ्यालेन्टाइन डेमा गुलाबको खपत धेरै हुन्छ। यस वर्ष नेपालमा चार लाख ५० हजार स्टिक गुलाबको माग आएको व्यवसायीले बताएका छन्।
यस वर्ष भ्यालेन्टाइन डेमा ५ करोड ६२ लाखको गुलाब खपत हुने अनुमान छ। मागको ८० प्रतिशत गुलाब भारतबाट आयात हुने गरेको छ।
यो पनि पढ्नुहोस्
