हेटौँडाका सबै विद्यालयहरु आज बन्द हुने
हेटौँडा । हेटौँडा उपमहानगरपालिकाले सोमबार भएको घटनालाई मध्यनजर गर्दै मङ्गलवार एक दिनका लागि नगरभरका सबै विद्यालय बन्द गर्ने निर्णय गरेको छ ।
उपमहानगरपालिकाले सोमबार साँझ एक सूचना सार्वजनिक गर्दै मङ्गलवार नगरका सबै सामुदायिक र निजी तथा संस्थागत शैक्षिक संस्थाहरू बन्द रहने जनाएको छ । उपमहानगरपालिकाले थप अप्रिय घटना नहोस् भन्ने उद्देश्यले विद्यालय बन्दको निर्णय गरेको सूचनामा उल्लेख गरेको छ ।
सोमबार जेनजीले गरेको प्रदर्शन हिंसात्मक बन्दा देशभर १९ जनाले ज्यान गुमाएका छन् भने तीन सयभन्दा बढी घाइते भएका छन् । विभिन्न ठाउँमा भइरहेको प्रदर्शनले शिक्षा क्षेत्रमा समेत प्रत्यक्ष असर पारेपछि विद्यालय बन्द गर्ने निर्णय गरिएको उपमहानगरपालिकाको ठहर छ ।
उपमहानगरपालिकाले यस विषम परिस्थितिमा विद्यार्थी, शिक्षक, अभिभावक र सम्पूर्ण नगरवासीलाई शान्त वातावरण कायम गर्न आग्रह गरेको छ । साथै परिस्थितिलाई संवेदनशील ढङ्गले समाधान गर्न सबै पक्षलाई आग्रह समेत गरेको छ ।
