एक जितले नेपाल सेमिफाइनलमा

नेपाली युवा क्रिकेट टोली एक जितका साथ एसिसी यू–१६ पुरुष इस्टर्न रिजन कप २०२३ प्रतियोगिताको सेमिफाइनलमा प्रवेश गरेको छ । मलेसियामा बुधबारदेखि भएको प्रतियोगितामा नेपालले थाइल्यान्डमाथि दुई सय २५ रनको फराकिलो अन्तरले जित निकाली अन्तिम चारको स्थान पक्का गरेको हो ।

नेपाली युवा खेलाडीले बलिङ र ब्याटिङमा सानदार प्रदर्शन गरे । समूह ‘ए’बाट नेपाल एक खेलअगाडि नै अन्तिम चारमा पुगेको हो । यस समूहमा मलेसियाले पनि दुई अंक जोडेको छ । लगातार दुई खेलमा पराजित थाइल्यान्ड प्रतियोगिताबाट बाहिरिएको छ । शुक्रबार नेपालले मलेसियाविरुद्ध खेल्नेछ । यस खेलको विजयी टोली समूहविजेता बन्नेछ । नेपाल प्रतियोगिताको साबिक दुईपटकको विजेता हो ।

सन्तोषको ह्याट्रिकसहित पाँँच विकेट
युवा बलर सन्तोष यादवले ह्याट्रिकसहित पाँच विकेट लिएपछि लक्ष्य पछ्याएको थाइल्यान्डको ब्याटिङ धराशायी भयो । नेपालले थाइल्यान्डलाई दुई सय ७० रनको लक्ष्य दिएको थियो । थाइल्यान्डले प्रत्युत्तरमा १३।२ ओभरमा ४४ रन मात्र जोड्यो । थाइल्यान्डका आठ खेलाडी शून्यमा पेभिलियन फर्किए । प्लेयर अफ दी म्याच सन्तोषले ३।२ ओभरमा मात्र आठ रन खर्चिंदै ५ विकेट लिएका हुन् ।

सन्तोषले इनिङ्सको १४औँ ओभरमा ह्याट्रिक पूरा गरेका हुन् । सन्तोषले १२।६ ओभरमा आठौँ नम्बरका सुथिमोन थाङसोमलाई एलबिडब्लू धरापमा पारे । १४।१ ओभरमा प्रियावत नोर्दीलाई बोल्ड गरे । १४।२ ओभरमा सुफानत मुआंगसाईलाई एलबिडब्लू गर्दै सन्तोषले ह्याट्रिक पूरा गरेका हुन् । सन्तोषले ओपनर दानुफोन फुयाङ्गोतपिनितलाई ९।४ ओभरमा १२ रनमा पेभिलियन पठाए । राथासत वानितचाखामलाई ११।४ ओभरमा शून्यमा पेभिलियन फर्काए । स्पिनर अशोक धामीले तीन ओभरमा २ मेडनसहित ४ रन खर्चेर तीन विकेट लिए । अभिषेक तिवारीले २ विकेट हात पारे । थाइल्यान्डका ब्याट्सम्यान ईशान बेनर्जीले १६ रन तथा डानुफोनले १२ रन बनाए ।

नीरज र सूर्यांशुको शतकीय साझेदारी
नेपालका ओपनरद्वय नीरजकुमार यादव र सूर्यांशु कोइरालाले शतकीय साझेदारी गरेपछि पहिलो ब्याटिङ गरेको नेपालले ३५ ओभरमा ८ विकेट गुमाउँदै दुई सय ६९ रनको विशाल योगफल तयार पारेको हो । ओपनर नीरजकुमारले ४३ बलमा सात चौका र ६ छक्काको मद्दतमा सर्वाधिक ७४ रन जोडे । सूर्यांशुले ५५ बलमा तीन चौकासहित ४० रनको योगदान गरे । नीरज र सूर्यांशुले पहिलो विकेटका लागि एक सय १० रनको साझेदारी गर्दै नेपाललाई उत्कृष्ट सुरुवात दिलाएका थिए ।

तेस्रो नम्बरका नरेन भट्टले ४३ बलमा पाँच चौकाको मद्दतमा अविजित ५५ रन जोडे । सन्तोषले आक्रामक ब्याटिङ गर्दै ३६ बलमा चार चौका र एक छक्कासहित ४२ रन बनाए । नरेन र सन्तोषले चौथो विकेटका लागि ५५ बलमा ७१ रनको साझेदारी गरेका हुन् । कप्तान अभिषेक तिवारीले १४ रन र विकेटकिपर आशिष लुहारले १३ रनको योगदान गरे । नेपालले अतिरिक्त १९ रन पाएको थियो । थाइल्यान्डका निटपाखन मनुवन, फानुवात र ईशान बेनर्जीले समान दुई विकेट लिए ।

आइसिसी वरीयतामा नेपाल यथावत्
एकदिवसीय विश्वकपअन्तर्गत ग्लोबल छनोटबाट बाहिरिएको नेपाल अन्तर्राष्ट्रिय क्रिकेट परिषद् ९आइसिसी०ले सार्वजनिक गरेको नयाँ वरीयतामा यथावत् स्थानमा छ । आइसिसीले बुधबार सार्वजनिक गरेको वरीयतामा नेपाल १४औँ स्थानमा छ । ग्लोबल छनोटको सुपर सिक्समा स्थान बनाउन चुकेको नेपालले अमेरिकालाई मात्र हराएको थियो । ग्लोबल छनोटको समूह ‘ए’मा नेपाल जिम्बावे, वेस्ट इन्डिज र नेदरल्यान्ड्ससँग पराजित भयो । नेपालले आइतबार सातौँ र आठौँ स्थानको प्लेअफ खेलका लागि युएईसँग खेल्ने तालिका छ ।

आइसिसीको वरीयतामा नेपालले ३८ खेलमा ३५ रेटिङ अंक पाएको छ । नेपालअघि १३औँ स्थानमा आयरल्यान्ड, १२औँमा स्कटल्यान्ड र जिम्बावे ११औँ स्थानमा छन् । सुपर सिक्समा स्थान बनाएको नेदरल्यान्ड्स १५औँ स्थानमा छ । अमेरिका १६औँ र नामिबिया १७औँ स्थानमा छन् । सुपर सिक्समा स्थान पक्का गरेको ओमान एकदिवसीय वरीयताका १८औँ स्थानमा छ । युएई १९औँ र पपुवा न्युगिनी २०औँ स्थानमा छन् ।

नयाँ वरीयतामा अस्ट्रेलिया शीर्ष स्थानमा छ । पाकिस्तान दोस्रो, भारत तेस्रो, न्युजिल्यान्ड चौथो, इंग्ल्यान्ड पाँचौँ र दक्षिण अफ्रिका छैटौँ स्थानमा छन् । बंगलादेश सातौँ, श्रीलंका आठौँ, अफगानिस्तान नवौँ र वेस्ट इन्डिज १०औँ स्थानमा रहेको आइसिसीले जनाएको छ ।

आसिफ र सोमपालको सुधार
आइसिसीको ब्याटिङ वरीयतामा ओपनर आसिफ शेख र अलराउन्डर सोमपाल कामीले स्थान सुधार गरेका छन् । आसिफ एक स्थान माथि उक्लँदै ७२औँ स्थानमा रहे । बलिङतर्फ सोमपालले पनि एक स्थान सुधार गर्दै ७४औँ स्थान प्राप्त गरे । ब्याटिङमा कप्तान रोहित पौडेल ७०औँ स्थानमा यथावत् छन् । बलिङतर्फ दीपेन्द्रसिंह ऐरी ५९औँ, लेगस्पिनर सन्दीप लामिछाने २९औँ, करण केसी ९२औँ र ललितनारायण राजवंशी ९६औँ स्थानमा छन् ।