एक वर्षपछि सुटिङमा फर्किए पल
एक घटनाका कारण ठ्याक्कै एक वर्ष जेल जीवन विताएर फर्किएका अभिनेता तथा मोडल पल शाह एक महिना परिवारसँग समय विताएपछि आफ्नो रोजीरोटीको काममा फर्किएका छन् । उनी एक वर्षपछि म्यूजिक भिडियोमार्फत छायांकनमा फर्किएका हुन् । बिहीबार मुस्ताङ वरपर छायांकन भइरहेको ‘आँशु बनी नखस कैले नि’ बोलको रोमान्टिक गीतमा पलले अभिनय गरिरहेका छन् ।
उनले आफू छायांकनमा फर्किएको जानकारी गराउँदै भिडियोकी मोडलसँगको एक तस्बिर सामाजिक सञ्जालमा सेअर गरेका छन् । जहाँ पलका प्रशंसकले उनी छायांकनमा फर्किएकोमा खुसी व्यक्त गरेका छन् । एक वर्षपछि आफ्नो नियमित काममा फर्किन पाउँदा पल पनि प्रफुलित मुद्रामा देखिएका छन् । जेल जानुभन्दा अगाडि नेपाली म्यूजिक भिडियोमा उनको एकछत्र राज थियो ।
रिहाइपछि उनलाई लिएर फिल्म र म्यूजिक भिडियो बनाउने चाहनेको संख्या ठूलो छ । उनलाई दिनहुँ फिल्म र भिडियोको अफर पुगिरहेको बताइन्छ । आफ्नो बढ्दो मागलाई मध्यनजर गर्दै उनले फिल्ममा ४०(५० लाख र म्यूजिक भिडियोमा ३ लाख पारिश्रमिक माग्ने गरेको चर्चा छ । जेल जानुभन्दा अगाडि पलले १८र२० लाखमा फिल्म र डेढरदुई लाखमा म्यूजिक भिडियो गर्ने गरेका थिए ।
पलले जेल जानुअघि ‘ओ सजन’, ‘सत्यम्’ र यश कुमारको एउटा अनटाइटल फिल्म साइन गरेका थिए । तर, अहिले उनले यी तीनै फिल्ममा काम गर्न इच्छा नदेखाएको स्रोत बताउँछ । जेलमुक्त भएपछि पल फिल्म र म्यूजिक भिडियो छनोटमा गम्भीर देखिएको उनी निकट व्यक्तिहरू बताउँछन् । अहिले उनले आफ्नो कामको व्यवस्थापन गर्ने जिम्मेवारी बहिनी रोशनीलाई सुम्पिएका छन् ।
