‘गडफादर’ टिजरमा चिरञ्जीवी र सलमान एकसाथ
तेलुगू फिल्मको मेगास्टारको रुपमा चिनिने चिरञ्जीवी स्टारर फिल्म ‘गडफादर’को तेलुगू र हिन्दी भर्सनको टिजर सार्वजनिक भएको छ । आइतवार परेको उनको जन्मदिनको अवसर पारेर सार्वजनिक गरिएको १ मिनेट ३४ सेकेन्डको टिजर बुलन्द छ । चिरञ्जीवी एक्सन अवतारमा प्रस्तुत छन् । उनको एक्सन शैली दमदार देखिन्छ । टिजरमा उनलाई गडफादरको रुपमा चित्रण गरिएको छ ।
टिजरको अर्को सशक्त पाटो बलिउड सुपरस्टार सलमान खानको उपस्थिति हो । उनलाई चिरञ्जीवीको ‘छोटे भाई’को रुपमा प्रस्तुत गरिएको छ । गोली बर्साउँदै इन्ट्री लिएका उनी टिजरको क्लाइमेक्समा चिरञ्जीवीसँग गाडीले भित्ता फोडेर देखाएका छन् । साउथ र बलिउड सुपरस्टार एकसाथ देखिँदा दर्शकलाई ठूलो सरप्राइज मिलेको छ । उनीहरुले पहिलो पटक एकसाथ काम गरेका हुन् ।
तेलुगू र हिन्दी भाषामा एकसाथ प्रदर्शन हुन लागेको फिल्ममा सलमान अतिथी भूमिकामा मात्र छन् । नयनतारा, पुरी जगन्नाध, सत्य देव लगायतको पनि अभिनय रहेको फिल्मलाई मोहन राजाले निर्देशन गरेका हुन् । चिरञ्जीवीका छोरा राम चरण, आरवी चौधरी र एनभी प्रसादले मिलेर फिल्मको निर्माण गरेका हुन् । आगामी विजयादशमीलाई लक्षित गर्दै अक्टोबर ५ मा फिल्म प्रदर्शन हुँदैछ ।
‘गडफादर’का लागि सलमान खानले एक रुपैयाँ पनि पारिश्रमिक लिएका छैनन् । उनले चिरञ्जीवी र राम चरणसँगको मित्रताका कारण पारिश्रमिक नलिएका हुन् । केमियोका लागि फिल्मका निर्माताले सलमानलाई २० करोडसम्म दिने तयारी गरेका थिए । तर, उनले पारिश्रमिक लिन ठाडै अस्वीकार गरे । उनले आफूलाई पारिश्रमिक दिए फिल्ममा काम नै नगर्ने अडान कसेको बताइन्छ ।
