‘म यस्तो गीत गाउँछु २’ ले भित्रायो प्रचारमा नयाँ ट्रेन्ड
यही फागुन १३ गतेबाट प्रदर्शनमा आउन लागेको यस वर्षको आशातित फिल्म ‘म यस्तो गीत गाउँछु २’ को टिमले प्रचारमा नयाँ शैली अपनाएको छ । प्रायः निर्माता तथा निर्देशकहरुले फिल्मको गीत, ट्रेलर वा टिजरलाई मात्र प्रचारको अस्त्र बनाइरहेको अवस्थामा निर्देशक सुदर्शन थापाले भने थारु र नेपाल भाषामा प्रमोशनल गीत बनाएर प्रचारमा नयाँ ट्रेन्डको सुरुवात गरेका छन् ।
बुधवार थारु भाषाको प्रमोशनल गीत सार्वजनिक गरेपछि निर्माण टिमले बिहीवार नेपाल (नेवारी) भाषाको प्रमोशनल गीत रिलिज गरेको छ । आश्रय रञ्जित र कल्पना श्रेष्ठको स्वर रहेको गीतमा नरेश योगीको शब्द रचना तथा संगीत छ । प्रमोशनल गीतको भिडियोमा नेपाल भाषाका कलाकारहरुसँगै फिल्मका लिड नायक पल शाह र नायिका पूजा शर्मा नेवारी पहिरनमा प्रस्तुत छन् ।
यो फिल्ममा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, गणेश गिरी, सोनिका रोकाय लगायतका कलाकारहरुको पनि अभिनय रहेको छ । बनिश शाह र मिलन श्रेष्ठको सम्पादन, सौरभ लामाको छायांकन, रामजी लामिछानेको कोरियोग्राफी र शैलेन्द्र प्रधानको ब्याकग्राउन्ड स्कोर रहेको फिल्मलाई पूजा शर्मा र सुदर्शन थापाले मिलेर निर्माण गरेका हुन् ।
‘म यस्तो गीत गाउँछु’ आफैंमा ब्रान्ड बनिसकेकाले हलसम्म दर्शक ओइरिने धेरैको अपेक्षा छ । त्यस्तै, पल र पूजाको स्टारडमको फाइदा पनि फिल्मले उठाउन सक्ने विश्लेषण कतिपयको छ । लभस्टोरी फिल्म निर्देशनमा अब्बल मानिने सुदर्शन थापामाथि पनि दर्शकले विश्वास गर्ने भएकाले फिल्मले सुस्ताएको नेपाली फिल्मको बजार तताउने देखिन्छ । फिल्मका गीतहरु पनि बलिया छन् ।
यो पनि पढ्नुहोस्
