युरोपा लिगको क्वाटरफाइनल समिकरण पुरा, को को पुगे ?
यस सिजनको यूइएफए युरोपा लिगको क्वाटरफाइनलको समिकरण पुरा भएको छ । गएराती अन्तिम १६ का खेलहरु सकिएपछि युरोपा लिगमा क्वाटरफाइनलमा खेल्ने सबै टिमको टुंगो लागेको हो ।
गएराती भएका खेलहरुमा बायर लिभारकुसनले रेन्जर्सलाई १-० ले पराजित गर्दै समग्रमा ४-१ ले विजयी हुदै क्वाटरफाइनलमा पुगेको हो भने सेभियाले रोमालाई २-० ले पराजित गर्दै क्वाटरफाइनलमा स्थान बनाएको हो । त्यस्तै बसेलले इनट्राचट फ्र्याकफ्रटलाई १-० गोल अन्तरले पराजित गर्दै समग्रमा ४-० ले विजयी हुदै क्वाटरफाइनलमा पुग्यो भने वोल्भरहम्पटनले ओलम्पियाकोस पिरेअसलाई १-० ले पराजित गर्दै समग्रमा २-१ गोल अन्तरले विजयी हुदै क्वाटरफाइनलमा पुगेको हो ।
अब योसँगै क्वाटरफाइनलमा इन्टर मिलान, म्यानचेस्टर युनाइटेड, सेभिया, बायर लिभरकुसन, वोल्भरहम्पटन, कोपनहेगन, बसेल र शख्तर डोनेटस्क पुगेका छन् । अब क्वाटरफाइनलका खेलहरु अगस्त १० र ११ मा हुने भएका छन् भने कोरोना महामारीका कारण होव एण्ड अवे खेल नभई नकआउट खेल हुने छन् ।
क्वाटरफाइनलमा अगस्त १० मा म्यानचेस्टर युनाइटेडले कोपेनहगेनको सामना गर्ने छ भने इन्टर मिलानले बायर लिभरकुसनविरुद्ध खेल्ने छ । त्यस्तै अगस्त ११ मा शख्तर डोनेटस्कले बसेलको सामना गर्ने छ भने वोल्भरले सेभियाको सामना गर्ने भएको छ । सबै खेल नेपाली समय अनुसार राति १२स्४५ मा हुने छन् ।
