मकवानपुरका दुई क्षेत्रबाट एमालेद्वारा प्रतिनिधिसभा निर्वाचनका लागि नौ जनाको नाम सिफारिस
हेटौंडा । नेकपा (एमाले) ले फागुन २१ गते हुने प्रतिनिधिसभा निर्वाचनका लागि मकवानपुरका दुई वटा निर्वाचन क्षेत्रबाट नौ जनाको नाम सिफारिस गरेको छ । पार्टीले मकवानपुर निर्वाचन क्षेत्र नम्बर–१ बाट सात जना र क्षेत्र नम्बर–२ बाट दुई जनाको नाम सिफारिस गरेको हो ।
एमाले मकवानपुर निर्वाचन क्षेत्र नम्बर–१ को बैठकले प्रतिनिधिसभा सदस्यका लागि केन्द्रीय सदस्य रामेश्वर राना र एका लाल श्रेष्ठ, जिल्ला उपाध्यक्ष हिदम लामा तथा पार्टी नेताहरू मदनकुमार दाहाल, कृष्णप्रसाद दाहाल, रामचन्द्र राई र नारायण सापकोटाको नाम सिफारिस गरेको छ ।
यसैगरी, मकवानपुर निर्वाचन क्षेत्र नम्बर–२ को बैठकले नेकपा एमालेका केन्द्रीय सदस्य तथा निवर्तमान सचेतक महेश कुमार बतौला र पार्टी नेता सुवास चन्द्र ठकुरीको नाम सिफारिस गरेको छ ।
सिफारिस भएका नामहरू जिल्ला कमिटी, प्रदेश कमिटी हुँदै केन्द्रीय कमिटीमा पठाइने र पार्टीको अन्तिम निर्णयअनुसार प्रतिनिधिसभा सदस्यका उम्मेदवार छनोट गरिने एमाले मकवानपुरले जनाएको छ ।
यो पनि पढ्नुहोस्
