जनजीवन सामान्य बन्दै, सेनाले कर्फ्यु र निषेधाज्ञाको निर्णय गर्न छोड्यो
पूर्वप्रधानन्यायाधीश सुशीला कार्की प्रधानमन्त्रीमा नियुक्त भएसँगै राजनीतिक अन्योल हटेको छ । जनजीवन बिस्तारै सामान्य हुन थालेको छ । मङ्गलबारको हिंसात्मक प्रदर्शनपछि नेपाली सेनाले कर्फ्यु र निषेधाज्ञा लगाउँदै आएकोमा अब जिल्ला प्रशासन कार्यालयहरुले आवश्यकता अनुसार निर्णय गर्न थालेका छन् ।
काठमाण्डौसहित धेरै ठाउँमा आज कर्फ्यु र निषेधाज्ञा छैन । सैनिक जनसम्पर्क निर्देशनालयले काठमाण्डौ उपत्यकामा हिजो बेलुकी सात बजेदेखि आज बिहान ६ बजेसम्म कर्फ्यु घोषणा गरेको थियो । त्यसपछि निर्देशनालयले थप निर्णय गरेको छैन । अब स्थानीय प्रशासनले आवश्यकताको आधारमा निर्णय गर्न सक्ने नेपाली सेनाले जनाएको छ ।
ललितपुर र भक्तपुर प्रशासनले आज बिहान ११ बजेदेखि ५ बजेसम्म निषेधाज्ञा र बेलुकी ७ बजेदेखि भोलि बिहान ६ बजेसम्म कर्फ्यु घोषणा गरे पनि काठमाण्डौले केही निर्णय गरेको छैन । अरु केही जिल्लाहरुले पनि कर्फ्यु र निषेधाज्ञालाई निरन्तरता दिएका छन् । केही जिल्लाहरुमा कर्फ्यु र निषेधाज्ञा कायमै रहे पनि जनजीवन सामान्य बन्दै गएको छ ।
अब कर्फ्यु र निषेधाज्ञा आवश्यक नभएकोले दैनिक कामधन्दा नियमित गर्नतर्फ प्रशासन लाग्नुपर्नेमा जनस्तरबाट माग भएको छ । हिजोदेखि लामोदूरीका गाडी पनि चल्न थालेका छन् । काठमाण्डौ उपत्यकामा पनि आजदेखि केही सार्वजनिक गाडी गुडेका छन् ।
यो पनि पढ्नुहोस्
