‘साइकल प्लाङक ब्यालेन्स’को उपाधि थापालाई
कपिलवस्तुमा भएको ‘साइकल प्लाङक ब्यालेन्स’ प्रतियोगिताको उपाधि सुशान्त थापाले जितेका छन् । शनिवार भएको प्रतियोगितामा उनले १२।३७ सेकेन्डमा ४४ मिटर दूरी पार गर्दै प्रतियोगिताको उपाधि जितेका हुन् ।
पानीमाथि ट्रयाक बनाएर खेलिने खेल लायन्स क्लब अफ कपिलवस्तुको आयोजनामा भएको थियो । १५० प्रतियोगीबीच भएको खेलमा प्रथम भएका थापाले ५० हजार रुपैयाँ नगद पुरस्कार प्राप्त गरेको क्लबका अध्यक्ष राम सुभागे थारूले बताए ।
प्रतियोगिताको पहिलो चरणमा ८ जनाले दूरी पार गरेका थिए । खेलमा रुपन्देही सैनामैनाका रिजन बन्जाडे द्वितीय भए । उनले २५ हजार रुपैयाँ प्राप्त गरे भने १५।०७ सेकेन्डको दूरीमा लक्ष्य चुमेका थिए ।
कपिलवस्तुका शौरव शर्मा तृतीय हुँदा सुदीप घिमिरेले सान्त्वना स्थान प्राप्त गरेका छन् । शर्माले १५ हजार रुपैयाँ पाएका छन् भने १६।२८ सकेण्डमा दूरी पार गरेका थिए । घिमिरेले स्मार्ट वाच पाएर चित्त बुझाए भने १६।५६ सकेण्डमा लक्ष्य चुमेका थिए ।
दोस्रो चरणमा ८ जनाबीच भएको प्रतिस्पर्धामा ६ जनाले दूरी पार गरे पनि २ जना बीचमै असफल भएका थिए । ६ जनाबीच दूरी पार गरेको समयलाई आधार बनाई विजेता बनाइएको अध्यक्ष थारूले बताए । जिल्लाको वाणगंगा नगरपालिका राजापानीको एक पोखरीमा भएको प्रतियोगिता हेर्न दर्शकको बाक्लो उपस्थिति रहेको थियो । कहिल्यै नहेरेको खेल हेर्न पाएको जनाउँदै दर्शक खुशी देखिन्थे ।
प्रतियोगितामा आयोजकले सहभागीको रजिस्ट्रेसन शुल्कबापत १ हजार ५०० रुपैयाँ तोकेको थियो भने टिसर्ट, खाजानास्ता, पानी र साइकल नहुनेका लागि साइकल, लाइफ ज्याकेट र हेल्मेटको व्यवस्थापन गरेको थियो ।
प्रतियोगितामा कपिलवस्तुसँगै रुपन्देहीबाट समेत सहभागी भएको खेल संयोजक विष्णु घिमिरेले जानकारी दिए । प्रतियोगिता सहभागीको सुरक्षाका लागि नेपाल प्रहरी र सशस्त्र प्रहरी बलको एम्बुलेन्सको व्यवस्था मिलाइएको थियो ।
