गायक अमात्यको जग्गामा नक्कली लालपूर्जा राखेर १९ करोड ऋण दिने कुमारी बैंकका कर्मचारीसहित चार जना पक्राउ
गायक गायक योगेश्वर अमात्यको नाममा १९ करोड रुपैया ऋण दिने कुमारी बैंकका कर्मचारीसहित चार जना पक्राउ परेका छन् । अमात्यको बारामा रहेको १२ बिगाहा जग्गाको नक्कली लालपुर्जाका आधारमा कुमारी बैंकका कर्मचारीले १९ करोड ऋण दिएको खुलेपछि बैकका कर्मचारीसहित चार जना पक्राउ परेका हुन् ।
बैंक २ जना कर्मचारी र अन्य २ जना मिलेर नक्कली लालपुर्जाको आधारमा १९ करोड ऋण प्रवाह गरेका थिए । अमात्यले जग्गाको हेरचाह गर्न राखेका व्यक्तिले सोबारे जानकारी पाएपछि प्रहरीमा उजुरी परेको थियो । प्रहरीको केन्द्रीय अनुसन्धान व्यूरोले नक्कली जग्गाधनी र बदमासी गर्ने बंैकका कर्मचारी पक्राउ गरेको छ ।
प्रहरीका अनुसार गायक अमात्यको नाममा बारामा १२ बिगाहा जग्गा थियो । उनले सो जग्गा कमाउन स्थानीयलाई जिम्मा दिएका थिए । काठमाडौंका एसके महर्जन र मुक्तिलाल गौतम नक्कली लालपुर्जा बनाएर कुमारी बैकको बारा शाखामा ऋण निकाल्न प्रक्रिया सुरु गरे । बैकका ऋण अधिकृत र सम्पत्तिको मूल्याङ्कनको जिम्मा पाएकाहरू मिलेर दुवै जनाको नाममा १९ करोड ऋण सदर गरिदिएका थिए । यता जग्गाको नक्कली लालपुर्जा राखेर ऋण निकाले पनि मालपोत कार्यालयमा भने जग्गाधनीमा अमात्यकै नाम थियो । पछि अमात्यको जग्गाको रेखदेख गर्ने व्यक्तिले घटनाबारे जानकारी पाएपछि अमात्यलाई खबर गरेका थिए ।
प्रहरीको केन्द्रीय अनुसन्धान ब्युरोले अनुसन्धान सुरु गर्दा किर्ते लालपुर्जाको आधारमा ऋण निकालिएको र २ महिना अगाडि नै बैकले ऋण समेत असुली सकेको छ । तर सरकारी कागजपत्र किर्ते गरेर बदमासी गरेको देखिएपछि ब्युरोको टोलीले बैकका २ जना र नक्कली जग्गा धनी दुवै जनालाई पक्राउ गरेर अनुसन्धानका लागि हिरासतमा राखेको छ । नेपालबहसबाट
