चोरहरुको समूहले प्रहरी प्रमुखलाई नै बन्धक बनाएपछि…
युक्रेनमा चोरहरुको समूहले एक प्रहरी अधिकारीलाई बन्धक बनाएका छन् । युक्रेनको पोल्तावा शहरस्थित अपराध शाखाका प्रमुखलाई उनीहरुले बन्धक बनाएका हुन् । प्रहरीको टोलीले उनीहरुलाई कार चोरेको आरोपमा पक्राउ गरेको थियो । तर उल्टै चोरले प्रहरी प्रमुखलाई बन्धक बनाइदिए । यद्यपि उनीहरु अफिसरलाई छाडेर जंगलतिर भागेका थिए । अचम्मको कुरा त यो छकि यसभन्दा अघि पनि त्यहाँ एकजना कनिष्ठ प्रहरी अफिसरलाई चोरहरुले नै बन्धक बनाएका थिए । उनलाई छुटाउने कोसिसमा लाग्दा अपराध शाखा प्रमुख नै उनीहरुको बन्धक हुन पुगे ।
त्यसबीचमा चोरहरुले चोरिएका गाडी मागेका थिए । शाखा प्रमुख गाडी दिन राजी भएपछि उनीहरुले उनलाई छाडिदिए । चोरहरु सोही गाडी लिएर प्रहरी प्रमुखसँगै भागेका थिए । तर उनीहरु प्रहरी प्रमुखलाई बीच बाटोमै छाडेर बाक्लो जंगलतिर भागेका थिए । ग्रिनेडसहित प्रहरी प्रमुखलाई बन्धक बनाएका उनीहरुले आफुले गरेको माग सम्बोधन भएपछि प्रहरी अधिकारीलाई छाडिदिएको बताएका थिए । यो घटना हुनु २ दिनअघि युक्रेनमै एक युवकले बसमा सवार १३ जनालाई बन्धक बनाएका थिए । हतियार र विष्फोटक पदार्थसहित उपस्थित भएका उनीसँग प्रहरीले १२ घण्टाको छलफपछि बन्धकहरुलाई मुक्त गर्न सफल भएका थिए ।एजेन्सी
