प्रधानमन्त्री मोदीविरुद्ध मोर्चाबन्दी गर्न खोज्दा मुख्यमन्त्री केजरीवाललाई धक्का !
भारतका प्रधानमन्त्री नरेन्द्र मोदीको सामना गर्न विपक्षी दलहरू एकजुट हुने प्रयासमा लागेका छन् । आगामी वर्ष २०२४ मा भारतमा लोकसभा चुनाव हुँदैछ ।
विपक्षी दललाई एकजुट गराउने प्रयासमा दिल्लीका मुख्यमन्त्री अरविन्द केजरीवाल समेत लागेका थिए तर उनलाई धक्का लागेको छ । केजरीवालले शुक्रवार हुने विपक्षी दलको बैठकमा मोदी सरकारले ल्याएको अध्यादेशबारे पनि छलफल र विरोध हुनुपर्ने माग राखे पनि अन्य दलले विपक्षी दलको बैठक आगामी चुनावकेन्द्रित मात्रै हुने बताएका छन् ।
केजरीवाल नेतृत्वको आम आदमी पार्टी (आप) ले राज्यसभामा मोदी सरकारले ल्याएको अध्यादेशको विरोधमा विपक्षी दल एकजुट हुनुपर्ने माग राखेका छन् । तर भारतीय कांग्रेसका वरिष्ठ नेता तथा पूर्व सांसद संदीप दीक्षितले विपक्षी दलको बैठकमा चुनावबारे मात्रै कुराकानी हुने बताए ।
उनले भने, ‘यो बैठक देशका थुप्रै राजनीतिक पार्टीको बैठक हो, जसलाई देशको चिन्ता छ, नकि सौदाबाजी गर्नेको बैठक ।’ उनले आपलाई सौदाबाजी गरेको आरोप लगाए । सत्तारुढ दल भारतीय जनता पार्टी (भाजपा) सांसद मनोज तिवारीले ‘अब आया ऊँट पहाड के निचे’ भनेर केजरीवालमाथि व्यंग्य गरेका छन् ।
अध्यादेशको विरोधमा समर्थन नजुट्ने देखेपछि आपले विपक्षी दलको बैठक बहिष्कार गर्ने सम्भावना रहेको भारतीय सञ्चारमाध्यमले जनाएका छन् ।
मोदी सरकारले केन्द्र शासित दिल्ली प्रदेशका अधिकार संकुचित गर्ने गरी ल्याएको अध्यादेशको मुख्यमन्त्री केजरीवालले विरोध गर्दै आएका छन् ।एजेन्सी
यो पनि पढ्नुहोस्
