अर्जेन्टिनी गोलरक्षक मार्टिनेजले जिते ‘गोल्डेन ग्लोभ्स’
अर्जेन्टिनाका गोलरक्षक एमिलियानो मार्टिनेजले २२ औं संस्करणको विश्वकपमा गोल्डेन ग्लोभ्स अवार्ड जितेका छन्।
फ्रान्सविरुद्ध पेनाल्टी सुटआउटमा उत्कृष्ट बचाउ गर्दै अर्जेन्टिनालाई विश्व च्याम्पियन बनाउन महत्वपूर्ण भूमिका निभाएको मार्टिनेज विश्वकपको उत्कृष्ट गोल रक्षक बनेका हुन्।
यसअघि क्वार्टर फाइनलमा नेदरल्याण्ड्सविरुद्ध पनि उनले पेनाल्टी रोक्दै टोलीलाई सेमिफाइनलमा पुर्याएका थिए। मार्टिनेजले विश्वकपका ७ खेलमा ३ क्लिनसिट राखे।
मार्टिनेजले यसअघि अर्जेन्टिनाले कोपा अमेरिका जित्दा पनि उत्कृष्ट गोलरक्षकको उपाधि जितेका थिए। ३० वर्षीय मार्टिनेज एस्टन भिल्लाबाट व्यवसायीक फुटबल खेल्छन्।
