नक्कली सुन सहित हेटौंडाबाट दुईजना पक्राउ
हेटौंडा । मकवानपुर प्रहरीले नक्कली सुन सहित दुई जनालाई पक्राउ गरेको छ । प्रहरीले हेटौंडा १ स्थित त्रिभुवनराजपथ सडकबाट पक्राउ गरेको हो । दोलखा जिरी नगरपालिका वडा नम्बर ३ बस्ने वर्ष ४७ को ध्याल सिंह शेर्पा र सोही मोटरसाईकल पछाडि सवार रहेका मकवानपुर राक्सिराङ गाउँपालिका वडा नम्वर ४ बस्ने अभय कुमार थिङलाई पक्राउ गरिएको जिल्ला प्रहरी कार्यालय मकवानपुरका प्रहरी उपरिक्षक मुकेश कुमार सिंहले जानकारी दिनुभयो ।
त्रिभुवन राजपथ सडक खण्डमा चेकजाँचको क्रममा भैंसे तर्फबाट हेटौंडा तर्फ आउँदै गरेको बा. ९३ प ९०६ नम्बरको पल्सर मोटरसाईकललाई रोकी चेकजाँच गर्दा नक्कली एक केजी सुन सहित पक्राउ गरिएको उहाँले वताउनुभयो । उनीहरुलाई नक्कली सुन, मोटरसाईकल सहित नियन्त्रणमा लिई ठगी मुद्दामा आवश्यक अनुसन्धान भइरहेको प्रहरीले जनाएको छ ।
यस अगाडि हेटौंडा उपमहानगरपालिका विभिन्न स्थानहरूमा विभिन्न मितिमा नक्कली सुन देखाई नगद सहित गरगहनाहरू ठगी गर्ने घटनाहरू भएकोमा घटनाहरू समेतमा निजहरूको संलग्नता हुन सक्ने देखिएको हुँदा अनुसन्धान भइरहेको प्रहरीको भनाई छ ।
