मकवानपुरमा गोली हानी पुजारीको हत्या, ७५ वर्षीय अभियुक्त पक्राउ
हेटौंडा । मकवानपुरको राक्सिराङ गाउँपालिका–१, कोलगैरी ठकुरीडाँडास्थित कुलदेवी मन्दिरका पुजारी ६४ वर्षीय ठूले गोलेको शुक्रबार बिहान गोली प्रहार गरी हत्या गरिएको छ । बिहान ९ बजेर ५२ मिनेटतिर भएको घटनामा गोलेको घटनास्थलमै मृत्यु भएको जिल्ला प्रहरी कार्यालय मकवानपुरले जानकारी दिएको छ।
पुजारी गोलेमाथि गोली प्रहार गरेको आरोपमा प्रहरीले ७५ वर्षीय इमान सिंह थोकरलाई नियन्त्रणमा लिएको छ । घटनापछि खटिएको प्रहरी टोलीले उनको साथबाट एक थान कटुवा पेस्तोल, पेस्तोलमा लाग्ने दुई राउण्ड गोली, एक थान खोका र १९० ग्राम गन पाउडर बरामद गरेको जनाएको छ। प्रारम्भिक अनुसन्धान अनुसार पुरानो रिसईबीका कारण थोकरले गोलेलाई गोली हानेको प्रहरीको भनाइ छ।
घटनाको जानकारी पाएका साथमै इलाका प्रहरी कार्यालय मनहरी र जिल्ला प्रहरी कार्यालय मकवानपुरबाट टोली खटिएको थियो। सादा पोशाकसहितको प्रहरी टोलीले थोकरलाई पक्राउ गरी थप अनुसन्धान अघि बढाइरहेको जिल्ला प्रहरी कार्यालय मकवानपुरका निमित्त प्रवक्ता प्रहरी निरीक्षक राजु प्रसाद कुर्मीले बताए।
