बजेटको तयारीमा जुट्दै मकवानपुरका दश स्थानीय तहः पूर्वाधार, कृषि, शिक्षा र स्वास्थ्यमा जोड

हेटौंडा । आउँदो असार १० गते स्थानी सरकारले बजेट ल्याउनुपर्ने कानूनी व्यवस्था रहेको छ । त्यही अनुसार बजेट ल्याउनका लागि मकवानपुरका दश वटा स्थानीय तहका जनप्रतिनिधिहरु र कर्मचारीहरु लागिपरेका छन् । संघीय सरकार, प्रदेश सरकारको बजेट ल्याइसकेपछी स्थानीय सरकारले बजेट ल्याउने ब्यवस्था रहेको छ । त्यही अनुसार बजेटका लागि तयारी थालिएको हो ।

मकवानपुरका धेरैजसो स्थानीय तहले आउँदो आर्थिक वर्षको बजेटमा शिक्षा, स्वास्थ्य, कृषि लगायतका क्षेत्रमा प्राथमिकता दिएर बजेट ल्याउने बताएका छन् । मकवानपुरगढी गाउँपालिकाले आउँदो आर्थिक बर्षको बजेटमा खानेपानी, बिजुली, शिक्षा, स्वास्थ्य र कृषि क्षेत्रलाई जोड दिने अध्यक्ष दोर्जे लामा स्याङतानले जानकारी दिनुभयो । बिशेषगरी गढीकै बिकट गाउँहरुमा अहिले पनि खानेपानीको समस्या भइरहेकाले यसमा जोड दिन लागिएको उहाँले बताउनुभयो ।

हेटौंडा उपमहानगरपालिकाले पनि यहाँका १९ वटा वडामा के के विकासका काम गर्ने भनेर योजनाबद्ध ढंगले काम गरिरहेको छ । बिशेषगरी बिकास निर्माण, सामाजिक क्षेत्र, शिक्षा, स्वास्थ्य, कृषिका कामलाई जोड दिइएको उपमहानगरपालिकाका मेयर मिना कुमारी लामाले बताउनुभयो ।

मकवानपुरको बकैया गाउँपालिकाले आउँदो आर्थिक वर्षको बजेटमा कृषिलाई बडी जोड दिइएको अध्यक्ष धर्मराज लामिछानेले बताउनुभयो । बिशेषगरी कृषिमा लागेका युवालाई स्वरोजगार बनाएर बिदेश पलाएन हुनबाट जोगाउनका लागि कृषिमा जोड दिन लागिएको उहाँले बताउनुभयो । कृषि पछी स्वास्थ्य, शिक्षा, खानेपानी, बिजुलीलाई जोड दिइएको बताउनुभयो ।

मकवानपुरको बकैया र गढी मात्र होइन । हेटौंडा उपमहानगरपालिका, बागमती गाउँपालिका, मनहरी गाउँपालिका, राक्सिराङ गाउँपालिका, कैलाश गाउँपालिका, इन्द्रसरोवर गाउँपालिका, थाहा नगरपालिका, भीमफेदी गाउँपालिका पनि बजेटको तयारीमा जुटेको छ । सबैजसो स्थानीय तहले भौतिक पूर्वाधारमा बडी जोड दिने बताएका छन् । धेरैजसो विकास खर्च सडक निर्माण, खानेपानी, बिजुली, भवन निर्माण लगायतका क्षेत्रमा खर्च गर्ने बताएका छन् ।