पल शाहलाई थुनामै राख्न उच्च अदालत पोखराको आदेश
एक नाबालिगलाई जबर्जस्ती करणी गरेको अभियोग लागेका अभिनेता तथा मोडल पल शाहलाई थुनामै राखेर अनुसन्धान प्रक्रिया अगाडि बढाउन उच्च अदालत पोखराले आदेश जारी गरेको छ । बिहीवार साँझ उच्च अदालतका न्यायाधीशद्वय उज्ज्वल शुक्ला र श्रीधरा कुमारी पुडासैनीको संयुक्त इजलासले जिल्ला अदालत तनहुँ र पूर्वी नवलपरासी अदालतको आदेशलाई सदर गरेको हो ।
गत चैत १० गते तनहुँ जिल्ला अदालतका न्यायाधीश हरिशचन्द्र ढुंगानाको इजलासले अभिनेता शाहलाई पुर्पक्षको लागि थुनामा पठाउन आदेश दिएको थियो । त्यसको केही दिनपछि पूर्वी नवलपरासी जिल्ला अदालतले पनि पललाई पुर्पक्षका लागि थुनामै राख्न आदेश दिएको थियो । दुवै जिल्ला अदालतको आदेशविरुद्ध पलका वकिलले उच्च अदालत पोखरामा पुनरावेदन चढाएका थिए ।
बिहीवार उच्च अदालत पोखरामा पल शाहको तर्फबाट कमलामोहन वाग्ले, भानुभक्त सुवेदी, माधव घिमिरे, जगदीश पाण्डे र मिलनध्वज शाहीले बहस गरेका थिए भने जाहेरीकर्ताको तर्फबाट सरकारी वकिल ईश्वरीप्रसाद ढकालले बहस गरेका थिए । शाहविरुद्ध जाहेरी दिने नाबालिग र उनका पिताले तनहुँ र नवलपरासीको अदालतमा बकपत्र गर्ने क्रममा बयान फेरिसकेका छन् ।
नाबालिगका बाबुले पलविरुद्ध जिल्ला प्रहरी कार्यालय, तनहुँमा गत फागुन ११ मा किटानी जाहेरी दिएका थिए भने फागुन १५ गते नवलपरासी प्रहरीमा पनि जबर्जस्ती करणीको अभियोगमा मुद्धा दर्ता गरेका थिए । यही दिन शाहले तनुहँ प्रहरी कार्यालयमा आत्मसमर्पण गरेका थिए । तनहुँले २१ दिन र नवलपरासी प्रहरीले ७ दिन हिरासतमा राखेर शाहमाथि अनुसन्धान गरेको थियो ।
दुवै जिल्लाका प्रहरी कार्यालयले अनुसन्धान सकाएर सरकारी वकिलको कार्यालयमा मिसिल बुझाएपछि तनहुँ र नवलपरासी दुवै अदालतमा मुद्धा दर्ता भएको थियो । शाहविरुद्ध दुवै जिल्लाको सरकारी वकिलको कार्यालयले मुलुकी अपराध संहिता २०७४ को दफा २१९ को ९३० को ९ग० अनुसार १२ देखि १४ वर्ष सजाय र चार लाखसम्म जरिवानाको माग दाबी गर्दै मुद्धा दर्ता गरेको थियो ।
तनहुँ र नवलपरासीको प्रहरी कार्यालयमा नाबालिगका बुबाले दिएको जाहेरीमा पल शाहले विभिन्न ठाउँमा पटक(पटक छोरीलाई जबर्जस्ती करणी गरेको उल्लेख छ । तर, पछि दुवै अदालतमा बकपत्र गर्ने क्रममा नाबालिगले आफूलाई शाहले जबर्जस्ती करणी नगरेको भन्दै बयान फेरेकी थिइन् । उनका बुबाले पनि ‘बुझ्दै जाँदा त्यस्तो केही नभएको रैछ’ भन्दै आफ्नो बयान फेरेका छन् । फिल्मीखबरबाट
