उनीहरुको मेहनतले परिणाम देखायो । दुबै जना सदस्य पदमा निर्वाचित भएका छन् । एकले अर्कालाई मत पनि नदिएको उनीहरुले बताए । ‘हामी श्रीमान, श्रीमती हौं, तर, एकले अर्कालाई भोट हालेनौं,’ कमलाले भनिन्, ‘उहाँ एमाले, कांग्रेस । कसरी उहाँलाई भोट हाल्न सक्छु र ?’
एउटै परिवारको व्यक्ति भए पनि श्रीमानलाई भोट दिँदा राजनीतिक बेइमानी हुने भएकाले मत नदिएको कमलाले बताइन् । ‘परिवारका सदस्य भए पनि हरेक व्यक्तिको विचार फरकफरक हुन्छ,’ उनले भनिन्, ‘विचार र सिन्द्धान्तले नै पार्टीमा जोडिने हो ।’
बुधबार बिहान निर्वाचन अधिकृतको कार्यालयले वडा नं. ७ मा निर्वाचितहरुको विवरण सार्वजनिक गरेको थियो । दुबै जना निर्वाचित भएका छन् । दुबै जना कसरी निर्वाचित हुनुभयो ? भन्ने प्रश्नमा कमलाले भनिन्, ‘टिकट पाएपछि वडाका सबै घरमा पुगेकी छु, सबैसँग मत मागेकी छु, उहाँले पनि सबैसँग मत माग्नु भयो होला ।’
महिला सदस्यमा कमलाले ७ सय ९२ मत पाएकी छन् भने उनका श्रीमान सन्दीपले खुल्ला सदस्यमा ७ सय ५५ मत पाएका छन् । दोश्रो खुल्ला सदस्यमा भने कांग्रेसका आयातबहादुर क्षेत्री ७५० मतसहित चुनिए ।
यो वडाको वडाध्यक्षमा नेकपा एमालेका ज्ञानेन्द्र बहादुर वहेकक्षेत्री ७६९ मतले विजयी भए, दलित महिला सदस्यमा कांग्रेसकी देविसरा सुनार ७९२ मतसहित निर्वाचित भइन् ।
