काठमाण्डौलाई सभ्य र समृद्ध बनाउन सबैसँग हातेमालो गर्छु : सिंह
काठमाण्डाै – काठमाण्डौ महानगरपालिकामा सत्ता गठबन्धनको तर्फबाट उम्मेदवार बन्नुभएकी सिर्जना सिंहले आफू विजयी भएमा सबैको अपनत्व महसुस गर्ने महानगर बनाउने बताउनुभएको छ । सत्ता गठबन्धनले आज शुक्रवार काठमाण्डाैकाे रत्नपार्कमा गरेको संयुक्त आम सभामा उम्मेदवार सिंहले सबै जातजातिकाे सम्मान गर्ने र सबैले यो आफ्नै महानगर हो भन्ने भावना जागृत गराउने बताउनुभयो ।
सिंहले काठमाण्डाैकाे समस्या समाधानका लागि विज्ञहरूसँग परामर्श गरेर अघि बढ्ने बताउनुभयो । आफू प्रतिनिधि पात्र मात्रै भएकाले महानगरका समस्या समाधान गर्न विज्ञहरूसँग छलफल र परामर्श गर्ने उहाँको भनाइ छ ।
युवाहरूलाई सीपसहित उद्यमी बनाउने प्रतिबद्धता व्यक्त गर्दै सिंहले युवा बेरोजगारी र विदेशिनुपर्ने पीडाबारे आफू जानकार रहेको भन्दै आफूले जितेको खण्डमा बेरोजगारी समस्या समाधान गर्ने बताउनुभयो ।
उहाँले महानगरमा सुशासन कार्यम गर्ने, सामुदायिक विद्यालयको अवस्था सुधार गर्ने, सम्पदा संरक्षण गर्ने, हरियाली बढाउने लगायतका आफ्ना मुख्य एजेन्डा भएको पनि बताउनुभयो ।मतदाताको शिर निहुरिने काम कहिल्यै नगर्ने भन्दै सिंहले काठमाण्डाैलाई महाघर जस्तो गरेर चलाउने बताउनुभयो ।
