निर्वाचन प्रक्रियामा भाग नलिने घोषणा गरेका रामचन्द्र पौडेल केन्द्रीय सदस्य बनेपछि…
नेपाली कांग्रेसका वरिष्ठ नेता रामचन्द्र पौडेलले पार्टीको १४औं महाधिवेशनको उद्घाटनपछि सम्पूर्ण प्रक्रिया बहिष्कार गरेपनि केन्द्रीय सदस्य मनोनित भएपछि उनकै समूहका नेताहरूले प्रश्न उठाएका छन् । संस्थापनइतरको साझा सभापतिको उम्मेदवार बन्न चाहेका पौडेललाई प्रकाशमान सिंहले स्वीकार नगरेपछि उनी मैदानबाट बाहिरिएका थिए ।
सभापतिको उम्मेदवार बन्न नपाएपछि उनले महाधिवेशनमा निर्वाचन प्रक्रियामा सहभागी नहुने बताएका थिए । तर उनी सभापति शेरबहादुर देउवाबाट केन्द्रीय सदस्य मनोनित भएपछि नेपाली कांग्रेसका नेता गुरुराज घिमिरेले पौडेलको नैतिकता र निष्ठामाथि प्रश्न उठाएका छन् ।
हाम्राश्रद्देय नेता रामचन्द्र पौडेल नेकांको चौधौं महाधिवेशनको नेतृत्व छनौट प्रक्रियाबाटअलगरहने निर्णय गर्नुभो।आज केसको मनोनयनमा पर्नुभो।प्रक्रियाबाटैअलग्गिएको व्यक्ति मनोनीत कसरी हुनुभो?राजनीतिमा नैतिकताको प्रश्न उठाउने उहाँ नैं हैन?अनि साझा सभापति हुन्छु भन्ने नेताको चयन यही हो?
— Gururaj Ghimire (@ghimire_gururaj) January 1, 2022
पौडेल १४औं महाधिवेशनमा कुनै पनि समूहमा खुलेनन् । जबकी उनी संस्थापनइतरबाट सभापतिको साझा उम्मेदवार बन्न चाहान्थे । प्रकाशमान सिंहले उनलाई समर्थन नदिएपछि विरक्तिएका उनले कुनै समूहलाई समर्थन नगर्ने बताएका थिए । पौडेलले सभापति देउवाले पार्टीमा नीति र विचारलाई समाप्त पारेको भन्दै विरोध गर्दै आएका थिए । महाधिवेशनको पहिलो चरणको निर्वाचनको अघिल्लो दिन उनलाई सभापति शेरबहादुर देउवाले घरमै गएर भेटेका थिए ।
त्यसपछि पौडेल भृकुटीमण्डपमा भएको महाधिवेशनमा मतदान गर्न त आएनन् । तर उनले लैनचौर ब्यांकेटमा महाधिवेशन प्रतिनिधिहरूका लागि चियापान कार्यक्रम आयोजना गरेका थिए । उक्त चियापानको बिल पूर्वमहामन्त्री शशांक कोइराला निकट ठेकेदार तथा पूर्वराज्यमन्त्री दीपक खड्काले तिरेको बताइन्छ ।
शशांक कोइराला आफैं केन्द्रीय सदस्यको उम्मेदवार रहेकाले उनी पहिलो चरणको निर्वाचनमा कतै पनि खुलेका थिएनन् । तर दोस्रो चरणको निर्वाचनमा शशांक कोइरालाले शेरबहादुर देउवालाई सभापतिमा समर्थन गरेका थिए ।
पौडेलले सभापति देउवाले पार्टीमा नीति र विचारलाई समाप्त पारेको साथै पार्टी कब्जा गर्न खोजेको भन्दै विरोध गर्दै आएका थिए तर रामचन्द्र पौडेलले पनि मौन रहेर शेरबहादुर देउवालाई सघाएको संस्थापनइतरका नेताको बुझाइ रहँदै आएको छ । पौडेलले आफू सभापतिको दौडबाट बाहिरिएपनि आफू सक्रिय राजनीतिबाट बाहिर नगएको बताउँदै आएका छन् ।
यो पनि पढ्नुहोस्
इकागजबाट
