हेटौंडा–१९ मा टिपरको ठक्करबाट मोटरसाइकल चालकको मृत्यु
हेटौंडा । हेटौंडामा टिपरको ठक्करबाट मोटरसाइकल चालकको मृत्यु भएको छ । हेटौंडा उपमहानगरपालिका वडा नम्बर–१९ दारिमटारमा टिपरले मोटरसाइकललाई ठक्करदिदा मोटरसाइकल चालकको मृत्यु भएको हो ।
मृत्यु हुनेमा मोटरसाइकल चालक चितवन रत्ननगरका अन्दाजी ४० बर्षीय युवराज आचार्य रहेका छन् । दुर्घटनामा मोटरसाइकलमा सवार बागलुङका ३३ बर्षीय नुर बहादुर थापा घाइते भएको र उनलाई उद्धार गरी उपचारका लागि चुरेहिल अस्पताल पठाइएको मकवानपुरका निमित्त प्रहरी प्रवक्ता प्रहरी निरीक्षक देवेन्द्र दासले जानकारी दिनुभयो ।
बुधबार बिहान हेटौंडाबाट मनहरीतर्फ जाँदै गरेको इट्टा बोकेको प्रदेश ३ ००१ ख १८४९ नम्बरको टिपर र विपरीत दिशाबाट आउँदै गरेको ना ४९ प ८२५२ नम्बरको मोटरसाइकल ठक्कर खाएको जिल्ला प्रहरी कार्यालय मकवानपुरले जनाएको छ ।
