प्रधानमन्त्री देउवा महाधिवेशन प्रतिनिधसँग भृकुटीमण्डपमा
काठमाण्डाै – प्रधानमन्त्री एवम् नेपाली कांग्रेसका सभापति शेरबहादुर देउवा पार्टीकाे १४ औँ महाधिवेशनस्थल भृकुटीमण्डपमा हुनुहुन्छ ।
उहाँ आज आइतवार बिहानदेखि भृकुटीमण्डपमा रहेर महाधिवेशन प्रतिनिधिहरूसँग अन्तरक्रिया र परामर्शमा व्यस्त हुनुभएको थियो ।
कांग्रेसको सभापतिमा उम्मेदवारी दिनुभएका देउवाले आज भृकुटीमण्डपमा जम्मा भएका महाधिवेशन प्रतिनिधि एवम् कांग्रेसका नेता तथा कार्यकर्तासँग अन्तरक्रिया गरी आफूलाई मत पनि माग्नुभएको थियो ।
त्यसपछि उहाँले महाधिवेशन प्रतिनिधिसँग काठमाण्डाैकाे बसाइँका बारेमा सोधपुछ गर्नुभएको थियो । खाना र बस्नका लागि कुनै समस्या परेको छ कि भनेर उहाँले भृकुटीमण्डपमा रहेका प्रतिनिधिसँग सोध्नुभएको थियो ।
उहाँले काठमाण्डाैमा चिसो बढेकाले स्वास्थ्यको ख्याल गर्न र कोरोना भाइरसको सम्भावित सङ्क्रमणबाट बच्नका लागि आवश्यक सतर्कता अपनाउन पनि सुझाव दिनुभएको थियो ।
उहाँले आज बिहानको खाना पनि भृकुटीमण्डपमा महाधिवेशन प्रतिनिधिसँगै लाइनमा बसेर लिनुभएको थियो ।
