पदमुक्त नगर्न माग गर्दै एमालेका १४ सांसद संसद् सचिवालयमा

जनपत्र
२ भाद्र २०७८, बुधबार १७:०९

काठमाण्डाै – नेकपा एमालेका वरिष्ठ नेता माधवकुमार नेपालसहित १४ जना प्रतिनिधि सभा सदस्यले आफूहरूलाई पदमुक्त नगर्न सङ्घीय संसद् सचिवालयमा पत्र बुझाएका छन् ।

गएकाे वैशाख २७ गते तत्कालीन प्रधानमन्त्री एवम् पार्टीका अध्यक्ष केपी शर्मा ओलीलाई संसदमा विश्वासको मत दिने बैठकमा मत नदिएको र गएकाे साउन ३ गते प्रधानमन्त्री शेरबहादुर देउवालाई पार्टीको नीति विपरीत विश्वासको मत दिएको स्थितिमा एमालेले ती सांसद्लाई कारबाही गर्न यही भदौ १ गते सङ्घीय संसद् सचिवालयमा पत्र पठाएको थियो ।

एमालेले राजनीतिक दलसम्बन्धी ऐनको दफा २८ बमोजिम कारबाहीका लागि सिफारिस गरेको जनाए पनि आफूहरूले त्याे कानुन विपरीत हुने गरी कुनै कार्य नगरेकाले कारबाही नगर्न आज बुधवार ती सांसदले माग गरेका हुन् ।

कारबाहीका लागि सिफारिस गरिएकामा माधव नेपालसहित जीवनराम श्रेष्ठ, मुकुन्द न्यौपाने, रामकुमारी झाँक्री, कल्याणी खड्का, लक्ष्मीकुमारी चौधरी, निरादेवी जैरु, पुष्पाकुमारी कर्ण, सरला यादव, कलिला खातुन, विरोध खतिवडा, कृष्णलाल महर्जन, भवानी खापुङ र मेटमणि चौधरी रहेका छन् ।

एमालेमा असन्तुष्ट रहँदै आएको याे पक्षले नयाँ अध्यादेशबमोजिम आजै नयाँ दल दर्ताको प्रक्रिया सुरु गरेको छ ।

 

यसमा तपाइको मत

Your email address will not be published. Required fields are marked *


*