जिता नदीको तटबन्ध भत्किँदा डेढ सय घर डुबानमा

जनपत्र
१ भाद्र २०७८, मंगलवार १६:१६

सप्तरी – सप्तरीको तिलाठी कोइलाडी गाउँपालिका वडा – ५ मा जिता नदीको पश्चिमी तटबन्ध भत्किँदा एक सय ५० घर डुबानमा परेका छन् । आज बिहानैदेखि जिता नदीमा पानीको बहाव उच्च रहेका कारण तटबन्ध भत्किएको हो ।

गाउँपालिकाको विपद् व्यवस्थापन शाखा प्रमुख राजेशकुमार झाका अनुसार तटबन्ध भत्किएर नदी बस्तीतर्फ सोझिएको छ । जिताको पानी खंग टोल, सरदार टोल र राम टोलका एक सय ५० घरमा पसेको झाले बताउनुभयो । उहाँका अनुसार दुई वटा घर भत्किएका छन् ।

बस्तीमा पानी पसेपछि स्थानीयवासी त्रसित छन् । उनीहरूलाई पशुचौपाया र सम्पत्ति जोगाउन मुस्किल रहेको छ । बाँध भत्किएर बस्तीतर्फ सोझिएपछि गाउँपालिकाका अध्यक्ष सतीशकुमार सिंहसहितको टोली प्रभावित क्षेत्रमा पुगेको छ ।

प्रभावितहरूको व्यवस्थापनका लागि तत्काल काम सुरु गरिएको अध्यक्ष सिंहले बताउनुभयो । उहाँले क्षतिको विवरण सङ्कलन भइरहेको जानकारी दिनुभयो ।

यसमा तपाइको मत

Your email address will not be published. Required fields are marked *


*