मनहरीमा तीन वटा ट्रक ठोकिदा एक जनाको मृत्यु, ११ जना घाईते
हेटौंडा / मकवानपुरको मनहरीमा भएको सवारी दुर्घटनामा परी एक जनाको मृत्यु भएको छ । अरु ११ जना घाईते भएका छन् । पूर्वपश्चिम राजमार्गअन्तर्गत मकवानपुरको मनहरी गाउँपालिका–९ स्थित जैसिङमा तीनवटा ट्रक आपसमा ठोक्किँदा एक जनाको मृत्यु भएको हो ।
हेटौंडा ३ बस्ने २५ बर्षिय निर्मला राइृको उपचारको क्रममा भरतपुर मेडिकल कलेजमा मृत्यु भएको जिल्ला प्रहरी कार्यालय मकवानपुरका प्रहरी उपरिक्षक मुकेश कुमार सिंहले बताउनुभयो ।
दुर्घटनामा परी ११ जना घाइते भएका छन् । ३ जनाको अवस्था गम्भीर छ । हेटौंडाबाट नारायणगढतर्फ जाँदै गरेको ना ६ ख ३३७४ नम्बरको ट्रक र नारायणगढबाट हेटौंडातर्फ आइरहेको ना ४ ख ११९२ नम्बरको ट्रक आपसमा ठोक्किएका हुन् । दुई ट्रक ठोक्किएपछि नारायणगढतर्फबाटै आइरहेको ना ६ ख ९९०७ नम्बरको तेस्रो ट्रक पनि ठोक्किएर दुर्घटना भएको हो ।
बिहान साढे ९ बजेको समयमा उक्त दुर्घटना भएको हो । घाईतेहरु ११ जनाको भरतपुरको पुरानो मेडिकल कलेजमा उपचार भइरेहको प्रहरीले जनाएको छ ।
घाइते हुनेमा तीनै ट्रकका चालक सहचालक र केही यात्रु पनि छन् । एक ट्रकले अर्कोलाई ओभरटेक गर्ने क्रममा दुर्घटना भएको प्रारम्भिक अनुमान गरिएको प्रहरीले जनाएको छ । दुर्घटनापछि केहीबेर राजमार्ग अवरुद्ध भएको थियो ।
