मकवानपुरमा बरामद गरिएको ६ सय ७८ केजी गाँजा नष्ट
हेटौंडा / मकवानपुर प्रहरीले जिल्लाका बिभिन्न स्थानबाट बरमद गरेको लागूऔषध गाँजा आज भैसेमा लगेर नष्ट गरेको छ । मकवानपुर, धादिङ लगायतका जिल्लाबाट भारत निकासी गर्न लागिएको गाँजा प्रहरीले नियन्त्रणमा लिएर आज नष्ट गरेको हो । लागूऔषध गाँजा नष्ट गर्दा पुरै गन्ध फैलिएको थियो । प्रहरीले बिभिन्न समयमा बरामद गरेको लागूऔषध गाँजा ६ सय ७८ किलो, चरेश २ सय ७३ किलो, अफिम ७ सय ग्राम, फेनार्गन २९ एम्पुल, व्यूप्रोनोर्फिन २९ एम्पुल, डाइजेपाम २९ एम्पुल, नाइट्रोभेट ५ सय ४७ ट्याब्लेट आज नष्ट गरिएको मकवानपुरका प्रहरी उपरिक्षक मुकेश कुमार सिंहले बताउनुभयो ।
प्रहरीले लागूऔषध अनुसन्धान तथा कारबाहीको फैसला पछि अदालतको अनुमतीमा उक्त परिमाणमा लागूऔषध नष्ट गरेको हो । यद्यपी ४ सय ४० किलो ८ सय ग्राम लागूऔषद भने अनसन्धानमै रहेकाले नष्ट गर्न बाँकी रहेको प्रहरीले जनाएको छ । २०७५ फागुन ८ गते देखि २०७६ साल वैशाख १ गतेसम्मको अवधिमा नियन्त्रणमा लिएको लागूऔषध नष्ट गरिएको एसपि सिंहले जानकारी दिनुभयो । भिमफेदी गाउँपालिका वडा नम्बर १ का अध्यक्ष, स्थानिय र पत्रकार लगायतको उपस्थितीमा लागूऔषध जलाएर नष्ट गरिएको हो ।
