कालीमाटी तरकारी बजार बन्द

जनपत्र
२८ बैशाख २०७८, मंगलवार १५:५२

काठमाण्डाै – काठमाण्डाै उपत्यकासहित देशभर कोरोना सङ्क्रमतिको सङ्ख्या बढेसँगै कालीमाटी फलफूल तथा तरकारी बजार बन्द हुने भएको छ । तरकारी बजार विकास समितिले मङ्गलवार (आज) एक सूचना निकालेर आजदेखि कृषक बजार बन्दको निर्णय भएको जनाएको हो ।

जिल्ला प्रशासन कार्यालय काठमाण्डाैकाे निर्णयअनुसार बजार बन्दको निर्णय भएको समितिका कार्यकारी निर्देशक विनोदकुमार भट्टराईले जानकारी दिनुभयो । उहाँका अनुसार आजदेखि कृषक बजार, बुधबारदेखि थोक बजारमा हुने खुद्रा कारोबार र बिहीबारदेखि खुद्रा बजार बन्दको निर्णय भएको हो ।

समितिले थोक बजारमा प्याकेजिङ मात्र गरेर तरकारीको बिक्री वितरण गर्न सक्ने जनाएको छ । जसमा एक वटा थोक पसलमा अधिकतम दुई जना बसी सामाजिक दुरी कायम गर्दै सरकारले तोकेको स्वास्थ्य सुरक्षाको मापदण्डको पालना गरी पसल सञ्चालन गर्न निर्देशन दिएको छ ।

समितिले बजार परिसरभित्र मोटरसाइकल, साइकल तथा ठेला प्रवेशमा प्रतिबन्ध लगाइएको जनाएको छ भने ठूला कृषकले स्वास्थ्य सुरक्षा मापदण्ड अपनाएर अक्शन र्‍याक/होल्डिङ र्‍याकमा कारोबार गर्न निर्देशन दिइसकेको छ ।

गएकाे वैशाख १६ गतेदेखि काठमाण्डाै उपत्यकाका तीन जिल्लामा निषेधाज्ञा लागू भएसँगै बिहान ३ देखि ९ बजेसम्म तरकारी बजार खुला हुँदै आएको थियो ।

यसमा तपाइको मत

Your email address will not be published. Required fields are marked *


*