ओलीलाई प्रचण्डको प्रश्न : यो सदन र यी सदस्यसँग विश्वासको मत माग्ने नैतिक अधिकार छ र ?

जनपत्र
२७ बैशाख २०७८, सोमबार १८:१३

काठमाण्डाै – माओवादी केन्द्रका अध्यक्ष पुष्पकमल दाहाल प्रचण्डले वाम गठबन्धन तथा विकास र समृद्धिलाई तोड्ने काम प्रधानमन्त्री केपी शर्मा ओलीले गरेको बताउनुभएको छ ।

प्रतिनिधि सभाकाे साेमवारकाे बैठकमा प्रचण्डले पार्टीभित्रको आन्तरिक विवादले सिङ्गो देश र समाजलाई आक्रान्त हुने गरी सार्वभौम संसद्लाई प्रधानमन्त्री ओलीले विघटन गरेर आफ्नो दम्भ र अहङ्कार देखाएको टिप्पणी गर्नुभयो ।

निरङ्कुश र स्वेच्छाचारी तरिकाले संसद् विघटन गरेकाले विश्वासको मत दिन नसकिने प्रचण्डको भनाइ छ । उहाँले प्रधानमन्त्री ओलीले विश्वासको मत लिने कुरा पनि तर्क सङ्गत नभएको र नाटकीय लागेको बताउनुभयो ।

प्रचण्डले प्रधानमन्त्री ओलीलाई यो सदन र यी माननीय सदस्यसँग विश्वासको मत माग्ने नैतिक अधिकार छ र ? भनेर पनि प्रश्न गर्नुभयो । यस्तै उहाँले बेला–बेलामा आफूलाई राष्ट्रिय समस्याका रूपमा चित्रित गरेको भन्दै राष्ट्रिय समस्या तपाईँ कि म ? भनेर प्रश्नसमेत गर्नुभयो ।

यसमा तपाइको मत

Your email address will not be published. Required fields are marked *


*