मनहरी गाउँपालिकामा ६ वटा वडा कार्यालय भवन निर्माण हुँदै
हेटौंडा । मकवानपुरको मनहरी गाउँपालिकामा ६ वटा वडा कार्यालयको भवन निर्माण हुँदै छ । अहिले भाडाको घरमा र अरु बिभीन्न संघसंस्थाका भवन र जिर्ण साघुरो भवनमा कार्यालय सञ्चालन गर्नुपर्ने बाध्यता भोग्दै आएकाले ६ वटा वडामा नयाँ भवन निर्माण गर्न लागिएको गाउँपालिकाका अध्यक्ष एकराज उप्रेतीले जानकारी दिनुभयो ।
मनहरीको वडा नम्बर १, २, ४, ५, ६ र ७ नम्बर वडा कार्यालयका भवन निर्माण गर्न लागिएको हो । मनहरी गाउँपालिकाले आफ्नै लगानीमा ६ वटा वडा कार्यालय भवन निर्माण गरेर भाडाको घरबाट सर्ने तयारी गरेको हो ।
वडा कार्यालयका भवन निर्माण गर्नका लागि चालु आर्थिक वर्षको बजेटमा गाउँपालिकाले एक करोड रुपैयाँका दरले पाँच करोड रुपैयाँ छुट्याएको थियो । एक करोड रुपैयाँ जिल्ला समन्वय समिति मकवानपुरले एक वडा वडा कार्यालय भवन निर्माण गर्न सहयोग गरेपछी ६ वटा वडा कार्यालयको भवन निर्माण गरिएको अध्यक्ष उप्रेतीले वताउनुभयो ।
ठेक्का मार्फत वडा कार्यालयको भवन निर्माण भइरहेको हो । ६ वटा मध्यमा एउटा भवन निर्माणको अन्तिम चरणमा पुगेको छ । अरु पाँच वटा वडा कार्यालयका भवनहरु धमाधम निर्माण भइरहेका छन् ।
