कांग्रेस र जसपाका शीर्ष नेताहरुको एकै स्वर : ‘तत्काल संसद अधिवेशन डाकाैँ’

जनपत्र
४ पुष २०७७, शनिबार १९:०८

काठमाण्डाै – नेपाली कांग्रेस र जनता समाजवादी पार्टी जसपाका नेताहरुबीच संसद अधिवेशनलगायत विषयमा सहकार्य गरेर अघि बढ्ने सहमति भएको छ ।

छलफलमा कांग्रेसको तर्फबाट सभापति शेरबहादुर देउवा, वरिष्ठ नेता रामचन्द्र पौडेल, नेता मिनेन्द्र रिजाल र रमेश लेखक सहभागि हुनुभएको थियो । यस्तै जसपाको तर्फबाट अध्यक्ष महन्थ ठाकुर, संघीय परिषद् अध्यक्ष डाक्टर बाबुराम भट्टराई र वरिष्ठ नेता राजेन्द्र महतो सहभागि हुनुभएको थियो ।

कांग्रेस सभापति देउवा निवास बुढानिलकण्ठमा भएको छलफलमा तत्काल संसद अधिवेशन बोलाउन संयुक्त रुपमा दबाब दिनेबारे छलफल भएको सभापति देउवाका स्वकीय सचिव भानु देउवाले उज्यालोलाई जानकारी दिनुभयो । तत्काल संसदको अधिवेशन बोलाउन एउटै स्वर बनाएर अघि बढ्नेबारे नेताहरुबीच छलफल भएको उहाँको भनाइ छ ।

यस्तै राष्ट्रपति विद्यादेवी भण्डारीले जारी गर्नुभएको संवैधानिक परिषद सम्बन्धी अध्यादेशबारे पनि नेताहरुबीच छलफल भएको छ । प्रधानमन्त्री केपी शर्मा ओलीले परिषद् सम्बन्धी अध्यादेश फिर्ता गर्न आफू तयार रहेको बताएपनि नेकपाभित्रको विवादका कारण अध्यादेश फिर्ता हुन सकिरहेको छैन । संसद अधिवेशन र अरु विषयमा पनि सहकार्य गरेर अघि बढ्नेबारे आजको बैठकमा छलफल भएको नेताहरुले बताएका छन् ।

यसमा तपाइको मत

Your email address will not be published. Required fields are marked *


*