मकवानपुरको बकैयामा युवकको हत्या गर्ने भोलन पक्राउ
हेटौंडा । मकवानपुरको बकैयामा युवकको हत्या गरी फरार रहेका युवकलाई प्रहरीले पक्राउ गरेको छ । सुक्रबार हत्या गरी फरार भएका भीमराज भोलन ललितपुरबाट पक्राउ परेका हुन् ।
बकैया गाउँपालिका–४ नयाँ दमारमा स्थानीय २० वर्षीय विकास वाईबाको हत्या गरी फरार रहेका भोलनलाई प्रहरीले ललितपुर जिल्ला बागमती गाउँपालिका–२ को मण्डला भन्ने स्थानबाट शनिबार साँझ पक्राउ गरिएको प्रहरी चौकी हात्तिसुडेका ईन्जार्च प्रहरी सहायक निरीक्षक कृष्णराज गौतमले जानकारी दिनुभयो ।
शुक्रबार दिउँसो वडा नंबर ४ को नयाँ दमार सिमात खोला नजिक विकास वाईवाको हत्या भएको थियो । हत्या गरी फरार रहेका भोलनलाई जिल्ला प्रहरी कार्यालय मकवानपुरमा राखिएको छ ।
शुक्रबार वाईबाको शवको टाउको र शरीर छुटिएको अवस्थामा फेला परेको थियो । वाईबाको शव हेटौंडा अस्पतालमा पोष्टमार्टमपछि परिवारले बुझेको जिल्ला प्रहरी कार्यालयले जानकारी दिएको छ ।
