चिनियाँ विदेश मन्त्रालय भन्छ, ‘नेपाली भूमि मिचिएकाे भन्ने रिपाेर्टहरु हल्ला र निराधार’
काठमाण्डाै – चीनले नेपालको कुनै पनि भूमि नमिचेको बताएको छ । यसअघि हुम्लाको लिमी उपत्यकामा चीनले सीमा मिचेर भवन निर्माण गरेको खबर सार्वजनिक भएपछि नेपालको सीमा नमिचेको बताएको चिनियाँ विदेश मन्त्रालयले फेरि त्यही कुरा दोहोर्याएकाे हो ।
नेपाली कांग्रेसका केन्द्रीय सदस्य तथा पूर्वमन्त्री जीवनबहादुर शाहीको टोलीले चीनले हुम्लाको लोलुङजोङमा नेपाली भूमि मिचेर भौतिक संरचना निर्माण गरेको निष्कर्ष निकालेको थियो । कर्णाली प्रदेश सभामा प्रमुख प्रतिपक्षी दलका नेतासमेत रहनुभएका शाहीको नेतृत्वमा सीमा क्षेत्रको अनुगमनका लागि गएको टोलीले नेपाली भूभाग मिचिएको निष्कर्षसहित प्रतिवेदन सार्वजनिक गरेको हो ।
पिलर नम्बर ५ देखि १२ नम्बरसम्म ११ दिन लगाएर गरेको स्थलगत अध्ययन तथा अनुगमनका क्रममा चीनले नेपाली भूभाग मिचेको ठहर भएको शाहीले बताएको खबर अन्तर्राष्ट्रिय सञ्चारमाध्ययमा आएपछि चीनले नेपाली भूमि नमिचेको दाबी दोहोर्याएकाे हो ।
