बाढी पहिरो अपडेट : २४ जनाको ज्यान गयो, ३७ जना बेपत्ता
काठमाण्डौ – लगातारको वर्षाकाे कारण देशका विभिन्न ठाउँमा ठूलो जनधनको क्षति भएको छ । अहिलेसम्म प्राप्त विवरणअनुसार देशका विभिन्न ठाउँमा शुक्रबारमात्रै बाढी र पहिरोमा परि २४ जनाको ज्यान गएको र ३७ जना हराइरहेका छन् ।
यस्तै म्याग्दीको विभिन्न ठाउँमा गरी तीन जनाको ज्यान गएको छ भने ३१ जना हराइरहेका प्रहरीले जनाएको छ ।
जाजरकोटको बारेकोट गाउँपालिका ४ मा पहिरोले घर बगाउँदा सात जनाको ज्यान गएको छ भने पाँच जना हराइरहेका छन् । बारेकोटकै धुमा खोलाले बगाउँदा एक जनाको ज्यान गएको छ, एक जना हराइरहेका छन् ।
यस्तै लमजुङमा तीन जना, रुकुम पश्चिममा दुई जना र गुल्मीमा एक जनाको ज्यान गएको प्रहरीले जनाएको छ । विपद् भएका ठाउँमा उद्धार तथा खोजीको काम भइरहेको सरकारले जनाएको छ ।
सिन्धुपाल्चोकमा बिहीबार बाढी र पहिरोमा परी हराइरहेका २१ जनाको शुक्रबार पनि खोजी भइरहेको छ ।
यसैबीच अहिले पनि देशका सबैजसो ठाउँमा मौसम बदली हुनुको साथै धेरै ठाउँमा हलुकादेखि सामान्य वर्षा भइरहेको मौसम पूर्वानुमान महाशाखाले जनाएको छ ।
गण्डकी प्रदेशमा भने धेरै ठाउँमा मध्यमदेखि भारी वर्षा भइरहेको मौसमविद् मीनकुमार अर्यालले जानकारी दिनुभयो । पश्चिमी न्यून चापीय प्रणालीको प्रभावले यही बिहीबारदेखि सक्रिय मनसुन आउँदाे सोमबारसम्म कायम रहने मौसम पूर्वानुमान महाशाखाले जनाएको छ ।
यस वर्ष वैशाखदेखि अहिलेसम्म प्रशस्त पानी परिरहेकाले जमिन गलिसकेको हुनाले केही समयको हल्कादेखि मध्यम वर्षाले पनि बाढी, डुबान र पहिरोको जोखिम बढेको महाशाखाले जनाएको छ ।
