काठमाण्डाै – केही दिनदेखि लगातार झरी परेको काठमाण्डौमा आज बिहानदेखि घाम लागेको छ । तर दिउँसोपख बदली हुने र पानी पर्न सक्ने मौसमविदले बताएका छन् ।
केही ठाउँमा भने अहिले पनि पानी परिरहेको छ । प्रदेश १ र सुदूरपश्चिमका केही ठाउँमा पानी परेको हो । प्रदेश २, वाग्मती, गण्डकी, प्रदेश ५ र कर्णालीमा पनि हल्कादेखि मध्यम वर्षा भैरहेको छ । मनसुन सक्रिय भएकाले छिनछिनमै मौसम बदली हुने मौसम पूर्वानुमान महाशाखाका मौसमविद् राजु प्रधानाङ्गले बताउनुभयो ।
आज प्रदेश १, प्रदेश २, गण्डकी प्रदेश र प्रदेश नम्बर ५ का एक दुई ठाउँमा भारी वर्षाको सम्भावना रहेको उहाँले बताउनुभयो । भारी वर्षा हुने क्षेत्रका इलाम, झापा, मोरङ, सुनसरी, सप्तरी, कैलाली, कञ्चनपुरका ठूला साना नदीमा पानीको बहाव बढ्ने भएकाले थप सतर्कता अपनाउन बाढी पूर्वानुमान महाशाखाले आग्रह गरेको छ ।
