सवारी नियम मिच्ने चालकलाई खादा र फूलका गुच्छा !
हामीलाई थाहा भएकै कुरा हो, सवारी चलाउने क्रममा सवारी चालनसन्बन्धी नियम पालना नगरेमा ट्राफिक प्रहरीले कारबाही गर्छन् । तर गोरखामा भने नियम उल्लंघन गर्ने सवारी चालकलाई पुष्पगुच्छा र खादा लगाइएको छ ।
आबुखैरेनी गोरखा सडकखण्डको १२ किलो बजारमा शुक्रबारकार्यक्रम गरी जिल्ला प्रहरी र जिल्ला ट्राफिक प्रहरी कार्यालयले यो अभियान सुरु गरेका हुन् । शुक्रबार पहिलो दिन नियमानुसार गरेका र नगरेका सबै चालकलाई खादा लगाएर फूल दियौँ, शनिबारदेखि भने नियम मिच्ने चालकलाई पहिले खादा लगाइदिन्छौँ अनि थप कारबाही गर्छौँ’, एसपी ओम अधिकारीले भन्नुभयो, ‘नियम पालना गरेर सवारी साधन चलाउनका लागि यो अभियानले प्रेरित गर्छ भन्ने विश्वास लिएका छौँ ।’ ट्राफिक नियम पालना नगर्नेलाई व्यङ्ग्यात्मक रूपमा सम्मान गर्ने अभियान सुरु गरिएको उहाँको भनाइ छ ।
