मकवानपुरको हाडीखोलाकी कान्छीमाया बनकरिया दसैंमा एकै पटक ८४ हजार रुपैयाँ हात पर्दा दंग

जनपत्र
१८ आश्विन २०७६, शनिबार ०८:५१

हेटौंडा — दसैंमा एकै पटक ८४ हजार रुपैयाँ हात पर्दा कान्छीमाया बनकरिया दंग छिन् । दसैंमा सिंगो परिवारले नयाँ लुगाको साथमा मासु–भात खान पाउने भएपछि उनी हर्षित भएकी हुन । सामाजिक सुरक्षा भत्ताबापत् उनको ७ जनाको परिवारले प्रतिव्यक्ति १२ हजार रुपैयाँका दरले ८४ हजार रुपैयाँ पाएका छन् ।

मनहरी गाउँपालिकाको रजैयास्थित बैंकबाट कान्छीमायाको परिवारले बिहीबार उक्त रकम पाए । गत आवसम्म उनीहरूले प्रतिमहिना २ हजार रुपैयाँ सामाजिक सुरक्षा भत्ता पाउने गरेका थिए । चालू आवको साउनदेखि प्रतिव्यक्ति प्रतिमहिना ३ हजार रुपैयाँ भत्ता पाउने गरेका छन् । सरकारले यो वर्षदेखि सामाजिक सुरक्षा भत्तामा एक हजार रुपैयाँ थपेको हो ।

वनकरिया समुदायमा सबैभन्दा बढी भत्ता बुझ्ने कान्छीमायाको परिवार हो । कान्छीमायाको घरमा मात्र होइन, वनकरिया बस्तीमै भत्ता भित्रिएको छ । मनहरी—४ मुसेधापमा रहेका १९ घर धुरीले भत्ता पाएका छन् । लोपोन्मुख वनकरिया गाउँमा ९ लाख ४८ हजार रुपैयाँ भित्रिएको छ । वनकरिया बस्तीमा रहेका ७९ जनाले सामाजिक सुरक्षा भत्ता पाउने गरेका छन् । गाउँपालिकाले साउनदेखि कात्तिकसम्म चार महिनाको सामाजिक सुरक्षा भत्ता बैंकमार्फत् उपलब्ध गराएको छ ।

‘वृद्धवृद्धा, एकल महिला, अपांगता र लोपोन्मुख समुदायलाई दसैंअघि नै भत्ता उपलब्ध गराएको मनहरी गाउँपालिकाका अध्यक्ष एकराज उप्रेतीले बताए । दसैंअघि नै गाउँपालिकाले भत्ता दिएकाले दसैं मान्न सजिलो भएको वनकरिया समुदायका अगुवा सन्तमाया वनकरियाले बताइन् । सरकारले मुलुकमा रहेका लोपोन्मुख आदिवासीको सूचीकृतमा वनकरिया, कुसुण्डा, राउटे, सुरेल हायू, राजी, किसान, लेप्चा, मेचे र कुशवाडिया आदी १० जाति छन् । कान्तिपुर दैनिकबाट । 

यसमा तपाइको मत

Your email address will not be published. Required fields are marked *


*