चन्द समूहले १९ जिल्लाका एनसेल टावरमा आक्रमण गरी क्षति

काठमाडौँ — प्रतिबन्धित नेत्रविक्रम चन्द समूहले १९ जिल्लाका एनसेल र एक जिल्लाको एनटिसी टावरमा आक्रमण गरी क्षति पुर्‍याएको छ । प्रहरी प्रधान कार्यालयका अनुसार कपिलवस्तु, कैलाली, झापा, डडेल्धुरा, डोटी, धादिङ, नवलपरासी पूर्व, पर्वत, पाँचथर, बाँके, बाग्लुङ मकवानपुर, मोरङ, म्याग्दी, रुपन्देही, ललितपुर, सिन्धुपाल्चोक, अछाम र सल्यान का एनसेल टावर र अर्घाखाँचीको एनटिसी टावरमा आक्रमण गरी क्षति पुर्‍याएको हो ।

प्रहरीका अनुसार अधिकांश स्थानमा आगजनीको प्रयास गरिएको छ भने ललितपुरको कोन्ज्योसोम गाउँपालिका २ मा रहेको एनसेलको टावरमा भने प्रहरीले प्रेसर कुकर बम बरामद गरेको थियो । उक्त बम लगनखेलस्थित नेपाली सेनाको राजदल गणबाट गएको डिस्पोजल टोलीले झण्डै साढे ७ बजे डिस्पोज गरेको थियो ।