‘नाईं नभन्नू ल ६’मा अनुभवको जोडी योगिशा
एउटा विश्वासिलो ब्रान्ड बनिसकेको नाम हो, ‘नाईं नभन्नू ल’ । यसका श्रृंखलामा को कलाकार छन् भन्ने कुराले त्यत्ति महत्त्व राख्दैन । किनकि, यो नाम आफैंमा फिल्म चलाउनका लागि काफी छ । यसैले त पाँचवटा श्रृंखलाले घरेलू बक्सअफिसमा उल्लेख्य कमाई गरे । दर्शक रुवाउने सिरिजको रुपमा चिनिएको यो फिल्मको छैटौं श्रृंखला आगामी बैशाख १ गते ९नयाँ वर्ष०देखि प्रदर्शन हुँदैछ ।
फिल्मको एउटा गीत र टिजर सार्वजनिक भइसकेको अवस्थामा यतिबेला काठमाडौंस्थित पशुपति क्षेत्रमा केही भागको छायांकन भैरहेको छ । छायांकन स्थलबाट फिल्मीखबरलाई उपलब्ध केही तस्विरहरुमा ‘नाईं नभन्नू ल’ सिरिजका चर्चित कलाकार अनुभव रेग्मी र ‘प्रेमगीत ३’ फेम्ड बाल कलाकार योगिशा खत्रीलाई देख्न सकिन्छ । यसको मतलब फिल्ममा उनीहरु जोडीको रुपमा छन् ।
‘नाईं नभन्नू ल’को दोस्रो श्रृंखलादेखि अनुभव टुटेका छैनन् । यो फिल्म दर्शकमाझ लोकप्रिय बन्नुमा उनी पनि एक मुख्य कारण हुन् । फिल्ममा उनलाई हेर्नकै लागि पनि हल जाने दर्शकको ठूलो वर्ग छ । तर, अहिले उनी न बाल कलाकार न हिरो बन्न उमेर पुग्छ । यसैले ‘नाईं नभन्नू ल ६’मा उनी अतिथि भूमिकामा सीमित भएका छन् । उनको ठाउँ निखिल उप्रेतीका छोरा अथर्वले लिएका छन् ।
विकासराज आचार्यद्वारा निर्देशित फिल्ममा आँचल शर्मा, आशिर्वाद क्षेत्री, प्रियंका कार्की, सरोज खनाल, केकी अधिकारीको पनि अभिनय छ । दुई हप्ता अगाडि सार्वजनिक टिजरमा एक्सनलाई प्राथमिकता दिइएको थियो । अब निर्देशक आचार्यले फिल्मलाई विषयवस्तुको हिसाबले अलग बनाउन खोजेको देखिन्छ । ‘नाईं नभन्नू ल’ सिरिजमै पहिलो पटक दर्शकले एक्सन हेर्न पाउनेछन् ।
