रूसले पाइपलाइनमार्फत् तेल आपूर्ति रोक्याे : पोल्यान्ड
पाेल्यान्डले रूसले पाइपलाइनमार्फत् तेल आपूर्ति रोकेको जनाएकाे छ ।
पाेल्यान्डको ऊर्जा समूह ‘पीकेएन अर्लेन’ ले सम्झौताअनुसार ओर्लेनको आवश्यकताको १० प्रतिशत हिस्सा ओगटेको ड्रुज्बा पाइपलाइनमार्फत् रुसले तेल पठाउन बन्द गरेकाे जनाएकाे हाे । पाेल्यान्डले भने रुसको यो कदमले आफ्ना उपभोक्तालाई तेल आपूर्तिमा कुनै असर नपार्ने जनाएकाे समाचार संस्था एएफपीमा उल्लेख छ ।
ऊर्जा समूह पीकेएन अर्लेनले अब सबै पेट्रोलियम पदार्थको आपूर्ति समुद्री मार्गबाट हुने जानकारी पनि दिएको छ । अहिलेसम्म अर्लेनले आफ्नो इन्धन आवश्यकताको झण्डै १० प्रतिशत रूसी पाइपलाइनमार्फत् र बाँकी सामुद्रिक मार्गबाट अन्य देशबाट आयात गर्दै आएको थियो ।
रुस–युक्रेनमा युद्धलाई लिएर युरोपेली सङ्घ (ईयू) ले नयाँ चरणको प्रतिबन्ध लगाउने सहमति गरेलगत्तै पाेल्यान्डले पछिल्लो घोषणा गरेको हो।
