मकवानपुरका बिद्यालय तथा क्याम्पसमा भव्य रुपमा मनाइयो सरस्वतीको पूजा
हेटौंडा । आज ‘श्रीपञ्चमी’ विद्याकी देवी सरस्वतीको पूजा गरी मनाइँएको छ । मकवानपुरका सरकारी तथा निजी बिद्यालय तथा क्याम्पसहरुमा सरस्वतीको पूजा भव्य रुपमा मनाइएको छ ।
हेटौंडा सहित जिल्लाका दश वटै स्थानीय तहका बिदालय, क्याम्पस सहित सबैजसो बिद्यालय र क्याम्पसहरुमा सरस्वती पूजा मनाइएको हो । हरेक वर्ष माघशुक्ल पञ्चमीका दिन श्रीपञ्चमी पर्व मनाउने गरिन्छ ।
विद्या र सिर्जनाकी देवी भएकाले विशेष गरी साहित्यकार, कलाकार, पत्रकार, शिक्षक, विद्यार्थीलगायतले आ–आफ्ना कलासाधनाका वस्तु कलम, कापी, कुची र वाद्ययन्त्र आदिलाई सरस्वतीका रूपमा पूजा गर्छन् ।
सूर्य उत्तरतिर लागि दिन लामो हुने र वसन्त ऋतु प्रारम्भ हुने भएकाले आजको दिनलाई ‘वसन्त पञ्चमी’ पनि भनिन्छ । आजका दिन विवाह, व्रतबन्ध, गुफा राख्ने र बेलविवाहजस्ता सामाजिक तथा धार्मिक कार्य गर्न साइत हेर्नुपर्दैन भन्ने मान्यता छ । यस दिन बालबालिकालाई शिक्षारम्भ गराउने र नाक–कान छेड्न पनि शुभ मानिन्छ ।
