काठमाण्डौ उपत्यकामा बन्द गराउँदै हिँड्ने २५ जना पक्राउ
काठमाण्डौ – काठमाण्डौ उपत्यकामा बन्द गराउँदै हिँडेका २५ जना बन्दकर्ता पक्राउ परेका छन् । नेत्रविक्रम चन्द विप्लव नेतृत्वको नेकपासहित चार वटा पार्टीले आह्वान गरेका बन्दमा काठमाण्डाै उपत्यकामा बन्द गराउँदै हिँड्ने २५ जना पक्राउ परेका प्रहरीले जनाएकाे छ ।
बन्दका कारण छोटो दुरीका गाडी सामान्य रूपमा चलेका छन् । लामो दुरीका गाडी भने फाट्टफुट्ट मात्रै चलेका छन् । बिहानको तुलनामा अहिले दिउँसो भने गाडीको चाप केही देखिएको छ । सडकमा गाडी चलाउन अवरोध नहोस् भनेर चोक–चोकमा प्रहरीको बाक्लो उपस्थिति रहेको छ ।
आजको बन्दलाई विप्लवसहित ऋषि कट्टेल अध्यक्ष रहेको नेपाल कम्युनिस्ट पार्टी, वैज्ञानिक समाजवादी कम्युनिस्ट पार्टी नेपाल र नेकपा (माओवादी समाजवादी) काे समर्थन रहेको छ । एमसीसी सम्झौता खारेज र महँगी नियन्त्रणलगायतका माग राख्दै आज बन्द आह्वान गरिएकाे हाे ।
